(නිමල කොඩිතුවක්කු)

සෑම වසරකදීම මෙම කාලය තුළ විදුලිය අර්බුදයක් ඇතිවීමේ අවදානමක් තිබුණ ද  සැලසුම් සහගතව ක්‍රියාකිරීමෙන් පසුගිය වසරවල එම තත්වය මඟහරවා ගත් බවත්  දින 52 ආණ්ඩුව හේතුවෙන් මෙම වසරේදී ඒ සඳහා සැලසුම් සකස් කිරීමට නොහැකි වීමෙන් රටට විදුලි අර්බුදයකට මුහුණ දීමට සිදුවූ බවත් ඩිජිටල් යටිතල පහසුකම් හා තොරතුරු තාක්ෂණ අමාත්‍ය අජිත් පී. පෙරේරා මහතා කොළඹදී පැවැසීය.

දිගුකාලීන හා මහාපාරිමාන විදුලිබලාගාර ඉදි වෙනතුරු තාවකාලික පියවර ගනිමින්  විධිමත් විදුලි සැලැස්මක් ක්‍රියාත්මක කිරීමට රජයට හැකියාව තිබූ බවද අමාත්‍යවරයා සඳහන් කළේය.

ඩිජිටල් යටිතල පහසුකම් හා තොරතුරු තාක්ෂණ අමාත්‍ය අජිත් පී. පෙරේරා මහතා මේ බව පැවසුවේ එම අමාත්‍යාංශ කාර්යාලයේ අද (8) පැවති මාධ්‍ය හමුවකට එක්වෙමිනි.

එහිදි වැඩිදුරටත් අදහස් දැක්වූ අමාත්‍ය අජිත් පී. පෙරේරා මහතා මෙසේ ද කීය.

“ දැන් විදුලි අර්බුදයක් ගැන අපිට චෝදනා කරනවා. විදුලි අර්බුදය ගැන විෂය භාර අමාත්‍ය රවී කරුණානායක මහතා ඒ ප්‍රශ්නය සොයා බලමින් ඉතා ඉක්මණින් විසඳුම් ගනිමින් සිටිනවා.

හැම අවුරුදුදකම රටේ මේ වගේ තත්වයක් ඇතිවෙනවා. අපි 2016, 2017 සහ 2018 වර්ෂවලදී කල් ඇතිව සූදානම් වෙලා ඒ අභියෝගය ජයගත්තා. දිගුකාලීන හා මහාපරිමාණ විදුලි බලාගාර ඉදි වෙනතුරු තාවකාලික පියවර ඒ සඳහා ගත යුතුයි.

මේ විදුලි අර්බුදයට සූදානම් වන්නේ ඔක්තෝබර් සිට නොවැම්බර් දක්වා කාල වකවානුව තුළයි. මේ වසරේදීත් ඒ සඳහා සැලසුම් සකස් කරමින් තිබුණා. 2018 වසර අවසානයේ ඇතිවූ දේශපාලන අස්ථාවරභාවය නිසා ඒ පියවර ගැනීමට වූ ප්‍රමාදය මේ අර්බුදයට හේතු වි තිබෙනවා” යැයිද අමාත්‍යවරයා එහිදී පැවැසීය.