(නිමල කොඩිතුවක්කු)  
   
නර බිල්ලක් ගෙන රට අර්බුදයකට ඇද දැමීම ඒකාබද්ධ නඩය කොළඹදී පවත්වන විරෝධතාවයේ ප‍්‍රධාන අරමුණ බව එක්සත් ජාතික පක්ෂයේ මාධ්‍ය ප‍්‍රකාශක විදුලි සංදේශ හා  ඩිජිටල් යටිතල පහසුකම් සහ විදේශ රැකියා අමාත්‍ය හරීන් ප‍්‍රනාන්දු මහතා පැවසීය.
 
විරෝධතාවය අතරතුර පොදු දේපලවලට සිදුවන හානි මෙන්ම ජීවිත හා දේපලවලට සිදුවන හානිවල වගකීම ඒකාබද්ධ විපක්ෂය විසින් බාරගත යුතු බවද  අමාත්‍යවරයා සඳහන් කළේය.
 
පාර්ලිමේන්තුවේ අමාත්‍යාංශ කාර්යාලයේ පැවති මාධ්‍ය හමුවකදී අද (4)  එක් වෙමින් ඒ මහතා මේ බව පැවසීය.
 
ඒකාබද්ධ විපක්ෂයේ විරෝධතාවය ගෝඨාභය රාජපක්ෂ මහතා සහ නාමල් රාජපක්ෂ මහතා අතර බලය පෙන්වීමේ තරගයක් බැවින් විරෝධතාකරුවන් අතරම ගැටුම් ඇති විය හැකි බවද අමාත්‍යවරයා එහිදි පැවසීය.
 
ජනතාවගේ එදිනෙදා කටයුතු අවහිර කිරිමේ  අරමුණින් ඒකාබද්ධ විපක්ෂය රැළිය පවත්වන නිශ්චිත ස්ථානය ප‍්‍රකාශයට පත්කර නොමැති බවද ඔහු කියා සිටියේය. 
 
මෙවැනි විරෝධතා මගින් රට තුළ  අරාබි වසන්තයක් නිර්මාණය කිරීම නාමල් රාජපක්ෂ මහතාගේ අරමුණ වී ඇති බවත් එයට යහපාලන රජයෙන් කිසිදු ඉඩක් නොමැති බවත් අමාත්‍යවරයා එහිදි වැඩිදුරටත් පැවසීය.