(සුජිත් හේවාජුලිගේ)

ෆයිසර් එන්නත් මාත්‍රා 78 ,000ක් ලබන මාසයේදී මෙරටට ලැබෙන බව ඖෂධ නිෂ්පාදන සැපයීම් හා නියාමන රාජ්‍ය අමාත්‍ය මහාචාර්ය චන්න ජයසුමන මහතා පැවැසීය.

එන්නත් මාත්‍රා 26,000 බැගින් සති තුනකදී මෙම එන්නත් තොගය ලැබෙන බවද ඔහු සඳහන් කළේය.

ෆයිසර් එන්නත් තොගය මිලදී ගනු ලබන්නේ රාජ්‍ය ඖෂධ නීතිගත සංස්ථාව විසිනි.

සෞඛ්‍ය ආරංචි මාර්ග සඳහන් කරන අන්දමට මෙරටට ලැබෙන පළමු ෆයිසර් එන්නත් තොගය මෙය වෙයි.

මේ අතර කොවිඩ් එන්නත්කරණ වැඩපිළිවෙළ යටතේ එන්නත් මාත්‍රා විසිදාහක් ඊයේ දිනයේ දී ලබාදුන් බව වසංගත රෝග විද්‍යා අංශය පවසයි.

මේ රටේ කොරෝනා එන්නත ලබාදී ඇති පුද්ගලයන් සංඛ්‍යාව තිස්තුන් ලක්ෂ හතළිස් පන් දහස් එකසිය හැට පහකි.