(සනත් ගමගේ)
 
හම්බන්තොට නගරාධිපතිවරයාගේ සෙල්ලම් පිස්තෝල සිද්ධියට සම්බන්ධ ගොන්නොරුවේ සුද්දා නමැති පුද්ගලයාගේ බව පැවසෙන කැබ් රථයකට හම්බන්තොට ගොන්නොරුව හයේ කණුව ප්‍රදේශයේදී පුද්ගලයකු වෙඩිතබා ඇති බවද, කැබ්රථයේ පිරිස එම පුද්ගලයා අල්ලා පොලිසිය බාරදුන් බවද හම්බන්තොට පොලීසිය කියයි.

කැබ් රථයට වෙඩි තැබීමට යොදාගත් කොටන තුවක්කුවද පොලිස්භාරයට ගෙන ඇත.

වෙඩිතැබීම කළ කළුවා නමැති පුද්ගලයා යතුරුපැදියකින් පැමිණ ඇතැයි පොලිසිය පවසයි.

වෙඩි තැබූ පුද්ගලයාට කැබ් රියේ සිටි අය පහරදී ඇති හෙයින්  ඔහු හම්බන්තොට මහ රෝහලට ඇතුළත් කර ඇත.

වෙඩි තැබූ පුද්ගලයා සමග  සුද්දා නමැත්තා අමනාපව සිටි බවද දැනට සිදුකළ  පරීක්ෂණවලින් හෙළි වී ඇතැයි පොලිසිය කියයි. 
 
වෙඩි වැදීමෙන් කැබ් රථයේ වම් පැත්තට හානි සිදු වී ඇති අතර පුද්ගලයින් කිසිවෙකුට තුවාල සිදුවී නොමැත.

සිද්ධිය සම්බන්ධයෙන් හම්බන්තොට මූලස්ථාන පොලිසිය වැඩිදුර විමර්ශන සිදු කරති.