(හර්ෂණ තුෂාර සිල්වා)

අයවැයක් ඉදිරිපත් කිරීමට නොහැකි නම් පාර්ලිමේන්තුවේදී අතුරු සම්මත ගිණුමක් සම්මත කරගැනීම තිබෙන හොඳම විකල්පය යැයි මහ බැංකු අධිපති ආචාර්ය ඉන්ද්‍රජිත් කුමාරස්වාමි මහතා අද (14) පැවැසීය.

අයවැයක් හෝ අයවැයක් සඳහා විසර්ජන පනත් කෙටුම්පතක් ඉදිරිපත් කිරීමට නොහැකි නම් හොඳම දේ අතුරු සම්මත ගිණුමක් සම්මත කරගැනීම යැයි ද හෙතෙම කීය. 

ශ්‍රී ලංකා මහ බැංකුවේ පැවැති මාධ්‍ය හමුවකදී අදහස් දක්වමින් මහ බැංකු අධිපතිවරයා එම කරුණු සඳහන් කළේය.

        “වත්මන් දේශපාලන අර්බුදය ආර්ථිකයට ලොකු බලපෑමක් කර නැහැ. දැනට තිබෙන නෛතික ප්‍රතිපාදනවලට අනුව විශාල බලපෑමකින් තොරව ආර්ථිකය පවත්වාගෙන යන්න පුළුවන්. මූලධර්මවලට බාධාවක් නැහැ. විදෙස් ණය ගෙවීමට ප්‍රශ්නයක් නැහැ. විදෙස් මූල්‍ය අංශය කළමනාකරණය කරගත හැකි මට්ටමක පවතිනවා. අයවැයක් ඉදිරිපත් කළ නොහැකි නම් අතුරු සම්මත ගිණුමක් සම්මත කරගැනීම තමයි තිබෙන හොඳම විකල්පය”.

හිටපු මුදල් අමාත්‍ය මංගල සමරවීර මහතා නොවැම්බර් 5 වැනිදා අයවැය ඉදිරිපත් කිරීමට නියමිතව තිබිණි. එහෙත් ජනාධිපති මෛත්‍රීපාල සිරිසේන මහතා හිටපු ජනාධිපති මහින්ද රාජපක්ෂ මහතා අග්‍රාමාත්‍යවරයා ලෙස පත් කළේය. ඉන් අනතුරුව නව කැබිනට් මණ්ඩලයක් දිවුරුම් දුන් අතර මහින්ද රාජපක්ෂ මහතා මුදල් හා ආර්ථික කටයුතු අමාත්‍යවරයා ලෙස දිවුරුම් දුන්නේය. එම ආණ්ඩුව යටතේ අතුරු සම්මත ගිණුමක් සම්මත කරගැනීමට නියමිතව තිබූ නමුත් ජනාධිපතිවරයා පාර්ලිමේන්තුව විසුරුවා හැරීමත් සමඟ එය ද ඉදිරිපත් කළ නොහැකි විය.