(නිමන්ති රණසිංහ)

නිව්යෝර්ක් නුවර පිහිටි සිටි බැංකු මූලස්ථානයේ පරිගණක ඡාලයට අනවසරයෙන් ඇතුලූ වී ඇමරිකානු ඩොලර් මිලියන 2.104 ක (රුපියල් කෝටි 32කට ආසන්න) මුදලක් වංචා කර සාවද්‍ය පරිහරණය කළැයි කියන සිද්ධියේ සැකකාර ශලීල මුණසිංහ යන අයට පනවා තිබූ විදෙස් ගමන් තහනම ඉවත් කරන ලෙසට කළ ඉල්ලීමක් කොළඹ කොටුව මහෙස්ත‍්‍රාත් රංග දිසානායක මහතා අද (21) ප‍්‍රතික්ෂේප කළේය.

මෙම සිද්ධියේ සැකකාර ශලීල මුණසිංහ යන අය මෙරට පුරවැසිභාවය හිමි පුද්ගලයකු නොවන බැවින් ඔහුගේ එම ඉල්ලීමට ඉඩ ලබාදිය නොහැකි බවට සදහන් කළ මහෙස්ත‍්‍රාත්වරයා පුරෝගාමී විනිසුරුතුමිය ද එවැනි ඉල්ලීමකට ඉඩ ලබා දී නැතැයි ද සදහන් කරමින් එම ඉල්ලීම ප‍්‍රතික්ෂේප කළේය.

මෙම සිද්ධියේ සැකකරුවන් වූයේ ෆෙයාවේල් එපාර්ට්මන්ට්, බුත්ගමුව පාර, රාජගිරිය පදිංචි ජනක චමින්ද නම්මුණී, අංක 441/12 බී, 6 වන පටුමග, ඇතුලූකෝට්ටේ ලිපිනැති ශලීල මුණසිංහ යන අයවලූන් ඇතුලූ සිව් දෙනෙකි.

මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුවේ ව්‍යාජ මුදල් විමර්ශන අංශයේ ස්ථානාධිපති සුගත් අමරසිංහ මහතා වෙත පැමිණිලි කර තිබුණේ ලංකා බැංකුවේ පුද්ගලික බැංකු සේවා අංශයේ කළමණාකරු ජගත් අනුරසිරි කුරුප්පු මහතා විසින් ඉකුත් 2017 අගෝස්තු මස 06 වැනිදාය.