( තිළිණි ද සිල්වා)

ශ්‍රී ලංකන් ගුවන් නියමුවන්ගේ සංසදයේ විධායක කමිටුවේ සාමාජිකයින් අකුරට වැඩ කිරීමට ගෙන ඇති වෘත්තීය සමිති ක්‍රියාමාර්ගය හේතුවෙන් එම ගුවන් සමාගමේ මෙහෙයුම්වලට දැඩි බාධා එල්ල වී ඇතැයි එම සමාගම් ආරංචි මාර්ග සදහන් කර සිටී.

රාජකාරියේ යෙදී සිටියදී කොවිඩ් ආසාදනය වන ගුවන් කාර්ය මණ්ඩල සාමාජිකයන් සඳහා විශේෂිත ප්‍රතිකාර පහසුකම් සහිත ස්ථානයක් ගුවන් සමාගම විසින් ලබා නොදීම සම්බන්ධයෙන් විරෝධය පළ කරමින් ශ්‍රී ලංකන් ගුවන් නියමුවන්ගේ සංසදයේ සාමාජික ගුවන් නියමුවන් මෙලෙස අකුරට වැඩ කිරීමේ ක්‍රියාමාර්ග ගෙන ඇතැයි එම ආරංචි මාර්ගවලින් පැවසේ.

ඒ අනුව මේවන විට ශ්‍රී ලංකන් ගුවන් නියමුවන්ගේ සංසදයේ සාමාජිකයින් ගුවන් සමාගමෙන් ලැබෙන ඇමතුම්වලට ප්‍රතිචාර නොදක්වා සිටීම, හදිසි අවස්ථාවක් සඳහා රාජකාරියට වාර්තා නොකිරීම, නිවාඩු දින වල වැඩ කිරීමෙන් වැළකී සිටින බවද එම ගුවන් සමාගම ආරංචි මාර්ග වලින් පැවසේ.

ශ්‍රී ලංකන් ගුවන් නියමුවන්ගේ සංසදය ඉකුත් 04 වැනිදා පැවති රැස්වීමේ මෙම අකුරට වැඩ කිරීමේ වෘත්තීය ක්‍රියාමර්ගය දී ගනු ලැබු තීරණ සම්බන්ධයෙන් එම සංසදයේ ලේකම් රෙහාන් ගුණරත්න මහතා  සාමාජික ගුවන් නියමුවන්ට නිල වශයෙන් දැනුම් දීමෙන් අනතුරුව මෙම වෘත්තීය ක්‍රියාමාර්ගය ගෙන සිටිති.

ලබන 21 වැනිදා කටුනායක හා මත්තල ගුවන්තොටුපොළවල් විදෙස් සංචාරකයින් සදහා විවෘත වන අවස්ථාවක මෙම වෘත්තීය ක්‍රියාමාර්ගය ගැනීම ගුවන් නියමුවන්ගේ හිගයකට හේතු විය හැකි යැයි එම සමාගම් ආංරචි මාර්ග වලින් වැඩිදුරටත් පැවසේ.

මේ සම්බන්ධයෙන් ශ්‍රී ලංකන් ගුවන් සේවා සමාගම නිවේදනයක් නිකුත් කරමින් කියා සිටියේ  ශ්‍රීලංකන් ගුවන් නියමුවන්ගේ සංසදයේ විධායක කමිටුවේ සාමාජිකයින් අකුරට වැඩ කිරීමට ගෙන ඇති තීරණයෙන් ගුවන් සමාගමේ මෙහෙයුම් වලට දැඩි බාධා ඇති වී ඇති බවය.ගුවන් නියමුවන් ඉල්ලා සිටින පහසුකම් ගුවන් සමාගමේ සාමාජිකයන්ට ලබා දීම සඳහා  අදාළ බලධාරීන්ගෙන් දැනටමත් ඉල්ලීම් කළ බවත් ,  ඉක්මනින් එම පහසුකම ලබා දෙනු ඇතැයිද ශ්‍රී ලංකන් ගුවන් සේවා සමාගම සිය නිවේදනයෙන් වැඩිදුරටත් කියා සිටී.

මාර්තු මාසයේ දී බණ්ඩාරනායක ජාත්‍යන්තර ගුවන්තොටුපල වසා දැමූ අවස්ථාවේ සිට මේ දක්වාම විදෙස් රටවල අතරමං වූ ශ්‍රී ලාංකිකයින් දිවයිනට රැගෙන ඒමේ මානුෂීය ක්‍රියාන්විතයට ද සහයෝගය ලබාදෙමින් සිටින බවද එම ගුවන් සමාගම පෙන්වා දේ.

මාස නවයක කාලය තුළ ගුවන් තොටුපළවල් වසා දැමීම සහ විවිධ රටවල් සංචාරක සීමා කිරීම් හේතුවෙන් ගුවන් සමාගමේ සමස්ත ගුවන් යානා ඇණියම බොහෝවිට ගොඩබස්සවා තැබීමට සිදුව ඇති බවත් , ඒ අනුව දිනකට සිදු කෙරෙන ගුවන් ගමන් වාර ගණන 10 ක් දක්වා අඩු වී තිබෙන එම සමාගම කියා සිටී.

පෙර නොවූ විරූ ආදායම් අහිමිවෙමින් තිබියදී ,මෙම තත්ත්වය මත ගුවන් සේවයට තාවකාලික ගුවන් ගමන් කාලසටහනක් අනුගමනය කිරීමට සිදුවූ අතර, ශ්‍රී ලාංකිකයන් නැවත මෙරටට ගෙන්වා ගැනීම සහ අත්‍යාවශ්‍ය භාණ්ඩ ප්‍රවාහනය කිරීම සම්බන්ධයෙන් රටේ අවශ්‍යතාවන්ට කඩිනමින් ක්‍රියාකිරීමට සිදුවන බවද ශ්‍රී ලංකන් ගුවන් සේවය කියා සිටී.

ඒ අනුව කොවිඩ් -19 වැළැක්වීම සඳහා බලධාරීන් විසින් නියම කර ඇති මාර්ගෝපදේශයන්ට අනුකූලව කෙටි දැනුම්දීමකින් රාජකාරියට වාර්තා කිරීමට ගුවන් සමාගමේ සියලුම සේවකයින්ට සිදුවන බවත්, එහිදී ගුවන් සේවය ගනු ලබන පූර්වාරක්ෂක ක්‍රියාමාර්ග සහ ගුවන් සමාගම විසින් සෑම විටම සපයනු බවද එම නිවේදනයේ වැඩිදුරටත් සදහන් වේ.

මෙම වසංගතය ආරම්භයේ සිටම ශ්‍රීලංකන් ගුවන් සේවයේ සේවකයින් දැඩි හා අනපේක්ෂිත සේවා පරිසරයක වැඩ කිරීමට සිදුවීම නිසා බොහෝ දුෂ්කරතා විඳදරාගෙන ඇති අතර වැටුප් කප්පාදු හේතුවෙන් ඔවුන්ගේ ආදායමෙන් යම් ප්‍රතිශතයක් ද අඩු වුවද , මූල්‍යමය අභියෝග හමුවේ රජය විසින් ගුවන් සේවය වෙනුවෙන් අයවැයෙන් අවශ්‍ය මුදල් නොවරදවාම ලබා දීම නිසා රට නැවත ගොඩනැඟීම සඳහා රජය ගන්නා උත්සාහයට සහාය වීම සේවකයින්ගේ යුතුකමක් බවද එම සමාගම කියා සිටී.

ශ්‍රීලංකන් ගුවන් සමාගමේ සේවකයින්ගෙන් එක් කොටසක් හිතාමතාම සමාගමේ සෙසු කැපවී වැඩ කරන වටිනා සේවකයින්ගේ උත්සාහයන් සහ ශ්‍රී ලංකා රජයේ අධිෂ්ඨානය අඩපණ කිරීම පිළිබඳව අධ්‍යක්ෂ මණ්ඩලය සහ ගුවන් සේවය දැඩි ලෙස කලකිරීමට පත්ව සිටින බවද ශ්‍රී ලංකන් ගුවන් සේවය නිකුත් කළ එම නිවේදනයේ වැඩිදුරටත් සදහන් වේ

මේවන විට ශ්‍රී ලංකන් ගුවන් සේවයේ නියමුවන් තිදෙනෙකුට කෝවිඩ් 19 වයිරසය ආසාදනය වී ඇති අතර ඔවුන් තිදෙනා මේ වනවිට ඉරණවිල පිහිටි රජයේ නිරෝධනය මධ්‍යස්ථානයේ රැදී සිටිමින් ප්‍රතිකාර ලබමින් සිටිති.