( තිළිණි ද සිල්වා සහ රංජන් කටුගම්පොළ )

උපරිමාධිකරණ සංකීර්ණයේ  ඇති වූ ගිනි ගැනීමේ සිද්ධියට අදාළව සිදුකරන විමර්ශන හේතුවෙන් ශ්‍රේෂ්ඨාධිකරණයේ සහ අභියාචනාධිකරණයේ අද(16) දින කැඳවීමට නියමිතව තිබූ සියලු නඩු කල් දැමූ බව  උපරිමාධිකරණ සංකීර්ණයේ ප්‍රධාන විධායක නිලධාරී මේජර් ජනරාල් ඩබ්ලිව්.ඩී.එල්.සී වික්‍රමසිංහ මහතා  පැවසීය.
 

මෙම නඩු විභාගයන් ඇතුළු ශ්‍රේෂ්ඨාධිකරණයේ සහ අභියාචනාධිකරණයේ අද (16)  කැදවීමට නියමිතව තිබූ නඩු සියල්ල  හෙටට  කල් තබා ඇතැයි ද උපරිමාධිකරණ සංකීර්ණයේ ප්‍රධාන විධායක නිලධාරීවරයා වැඩිදුරටත් කීය.

උපරිමාධිකරණ සංකීර්ණයේ  අබලි ද්‍රව්‍ය ගබඩා කර ඇති කාමරයක ඇතිවූ හදිසි  ගිනි ගැනීමක්   ඊයේ (15) සවස ඇති වූ අතර පැයකට පසුව එම ගින්න මැඩපැවැත්වීමට ගිනිනීවීමේ සේවා දෙපාර්තමේන්තු නිලධාරීන්ට හැකි විණි.

අධිකරණයට අපහාස කළේ යැයි චෝදනා එල්ල වී සිටින හිටපු රාජ්‍ය අමාත්‍ය රන්ජන් රාමනායක මහතාට එරෙහිව විභාගය වන අධිකරණ අපහාස නඩුව අද (16) ශ්‍රේෂ්ඨාධිකරණය හමුවේ කැඳවීමට නියමිතව තිබුණත් එය කැඳවීමක් සිදු වූයේ නැත.මෙම පැමිණිල්ල අද සිසිර ද ආබෲ, විජිත් මලල්ගොඩ සහ මුර්දු ප්‍රනාන්දු යන මහත්ම මහත්මීන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවීමට නියමිතව තිබුණි.

මීට අමතරව මෑතකදී නිකුත් කළ විශ්ව විද්‍යාල කඩඉම් ලකුණු අනුව ඉංජිනේරු සහ භෞතික විද්‍යා පීඨ වලට සිසුන් ඇතුලත් කර නොගන්නැයි ඉල්ලා සිසුන් පිරිසක් ගොනු කළ මූලික අයිතිවාසිකම් පෙත්සමද වැඩිදුර විභාගය සදහා අද කැදවීමට නියමිතව තිබිණි.