වැස්සෙන් අවතැන්වූන්ට කඩිනමින් සහන සලසන්න ජනපති උපදෙස්

(විනීතා එම් ගමගේ)

අධික වැසි සහ ගංවතුරෙන් විපතට පත්වූ මුලතිව්, කිලිනොච්චි සහ මන්නාරම  දිස්ත‍්‍රික්කවල ජනතාව වෙනුවෙන් කඩිනමින් සහන සැලසීම සඳහා අවශ්‍ය ප‍්‍රතිපාදන කඩිනමින් මුදාහරින ලෙස ජනාධිපති මෛත‍්‍රීපාල සිරිසේන මහතා අදාළ නිලධාරින්ට උපදෙස් දී ඇත.

ගංවතුර තර්ජනය පහව යනතෙක් තර්ජිත ප‍්‍රදේශ වල වැසියන් සියලූ දෙනා වෙත අවශ්‍ය සියලූ පහසුකම් නොපමාව සලසන ලෙස ද ජනාධිපතිවරයා උපදෙස් දී තිබේ.

 ඒ සඳහා අවශ්‍ය ප‍්‍රතිපාදන කඩිනමින් දිස්ත‍්‍රික් ලේකම්වරුන් වෙත මුදාහරින ලෙසත් අමාත්‍යංශ ලේකම්වරුන් ඇතුළු  අදාළ අංශවලට උපදෙස් දී ඇති ජනාධිපතිවරයා උතුරු පළාත් ආණ්ඩුකාරවරයා, දිස්ත‍්‍රික්ලේකම්වරුන්, යුද හමුදාපතිවරයා සහ ආපදා කළමනාකරණ මධ්‍යස්ථාන එක්ව මෙම සහන වැඩසටහන් කඩිනමින් ක‍්‍රියාත්මක කරන ලෙසට ද වැඩිදුරටත් උපදෙස් දී ඇත.

 
උතුරු පළාතට බලපෑ තද වැසි හේතුවෙන් කිලිනොච්චි, මුලතිව් සහ මන්නාරම දිස්ත‍්‍රික්ක ගංවතුර තර්ජනයට මුහුණ පෑ අතර, ඒ හේතුවෙන් පිටාර මට්ටම ඉක්මවා ගිය ඉරණමඩු ඇතුළු ජලාශ කිහිපයක වාන්දොරටු විවෘත කිරීමට ද කටයුතු කර තිබේ. 

ගංවතුර තර්ජනය හේතුවෙන් කිලිනොච්චි, මුලතිව් සහ මන්නාරම් දිස්ත‍්‍රික්ක වල වැසියන් විපතට පත්ව පීඩා විදින අතර එම දිස්ත‍්‍රික්ක වල ක‍්‍රියාත්මක ආරක්ෂිත කඳවුරු 40ක් තුළ එම වැසියන්ට සහන සැලසීමට ආපදා කළමනාකරණ මධ්‍යස්ථානය කටයුතු යොදා ඇතැයි ජනාධිපති ලේකම් කාර්යාලය කියයි.