(රොමේෂ් මධුෂංඛ)

පුරාවිද්‍යා දෙපාර්තමේන්තුවේ නිලධාරීන් හා චීන නිලධාරීන් පිරිසක් යාපනයේ අලෙයිපිඩ්ඩි ප්‍රදේශයේ කළ කැණීම්වලදී සොයා ගත් මැටි බඳුන වසර 600-400 ත් අතර ඉපැරණි කාලයකට අයත් චීන මැටි බදුනක් බව යාපනය විශ්ව විද්‍යාලයේ ඉතිහාසය හා පුරාවිද්‍යා අංශයේ මහාචාර්ය පී.පුෂ්පරත්නම් මහතා පැවසීය.

මේ මැටි බඳුන චීනයත් ශ්‍රී ලංකාවත් අතර අතීතයේ සිට ඉතා සෘජු සබඳකම් ඇති බවට ඉතාම හොඳ සාධකයක් බව කී පුෂ්පරත්නම් මහතා පසුගිය වසරේ දී මේ ස්ථානයට නුදුරින් හමු වූ චීන කාසිය ද ඊට හොඳම නිදසුනක් බව කියා සිටියේය.

අලුතින් හමු වූ මැටි බඳුන මීට දින කීපයකට පෙර හමු වූ අතර එම මැටි බඳුන පරීක්ෂා කිරීමෙන් පසුව යාපනය විශ්වවිද්‍යාලයේ මහාචාර්යවරයා ඒ බව කියා සිටියේය.

චීන විශ්වවිද්‍යලයක මහාචාර්යවරයකු, ආචාර්යවරු දෙදෙනකු හා පුරාවිද්‍යාඥයින් පිරිසක් චීන රජයේ වියදමින් යාපනය  ප්‍රදේශයේ කැණීම් කටයුතු කරගෙන යනු ලබන්නේ ශ්‍රී ලංකාවත් චීනයත් අතර අතීතයේ පැවති සබදකම්  පිළිබදව තොරතුරු ගවේෂණය කිරීමේ අරමුණිනි.