(ඩයනා උදයංගනී)

විශ්වවිද්‍යාවලට ඇතුළත් කර ගැනීමේ අයදුම්පත් කැඳවීම අන්තර්ජාලය ඔස්සේ මේ දිනවල සිදුකෙරෙන අතර සංචරණ සීමා පවතින කාලයේදී විදුහල්වලින් ලබාගන්නා සහතික ආදිය නොමැතිව තමන් සතුව පවතින තොරතුරු පමණක් අයදුම්පත්‍රයට ඇතුළත් කිරීම ප්‍රමාණවත් යැයි විශ්ව විද්‍යාල ප්‍රතිපාදන කොමිෂන් සභාවේ සභාපති, ජ්‍යෙෂ්ඨ මහාචාර්ය සම්පත් අමරතුංග මහතා පවසයි.

ඒ අනුව එම අයදුම්පත් සමඟ පාසල්වලින් හා ග්‍රාම නිලධාරීන්ගෙන් ලබාගත යුතු සහතික එවීම කළ යුතු නැතැයි කී සභාපතිවරයා එම සහතික සංචරණ සීමා ඉවත්කර සති තුනක් ඇතුළත විශ්ව විද්‍යාල ප්‍රතිපාදන කොමිසම වෙත එවීම ප්‍රමාණවත් බවද සඳහන් කරයි.

සංචරණ සීමා පැනවීම සමඟ පාසල් වසා තිබීම නිසා පාසල් අයදුම්කරුවන්ට පාසල් හැරයාමේ සහතික, විදුහල්පතිගේ සහතික ආදිය ලබාගැනීමත්, බාහිර අයදුම්කරුවන්ට තම පදිංචිය සහතික කරන ග්‍රාමසේවක සහතික මෙන්ම නම්වල වෙනස්කම් පවතින අයට නම් තහවුරු කිරීමේ සහතික ලබාගැනීමත් ගැටලුවක් වී ඇති බැවින් මෙම තීරණය ගත් බවද මහාචාර්යවරයා කීවේය.

මහාචාර්ය සම්පත් අමතුංග මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේ දී අද (24) පැවති මාධ්‍ය හමුවකට එක්වෙමිනි.