(රවින්ද්‍ර ප්‍රභාත් නෙත්තසිංහ)

2022 වසර සදහා වාරියපොළ ප්‍රාදේශීය සභාවේ  අද (12) ඉදිරිපත් කළ අයවැය ඡන්ද තුනකින් පරාජයට පත්විය. සභාපති ඩී.එම්.ටී. බී. දිසානායක මහතා විසින් මහ සභාවට අයවැය ඉදිරිපත් කළේය. එහිදී එක්සත් ජාතික පක්ෂය, ශ්‍රී ලංකා නිදහස් පක්ෂය, ජනතා විමුක්ති පෙරමුණ, ශ්‍රී ලංකා මහජන පක්ෂය නියෝජනය කරන මන්ත්‍රීවරු අයවැය යෝජනාවේ අඩුපාඩු පෙන්වා දෙමින් කතා කළහ.

ආණ්ඩු පක්ෂය වන ශ්‍රී ලංකා පොදුජන පෙරමුණ නියෝජනය කරන ප්‍රාදේශීය සභාවේ උප සභාපති අනුර සුදර්ශණ මහතා ඇතුලු එම පක්ෂයේ මන්ත්‍රීවරුන් කිහිප දෙනකු අයවැයට යෝජනාවට විරුද්ධව අදහස් ප්‍රකාශ කළහ.

මෙහිදී ජනතා විමුක්ති පෙරමුණ සහ ශ්‍රී ලංකා නිදහස් පක්ෂය අයවැය යෝජනාව සදහා ඡන්දයක් ඉල්ලා සිටි අතර සභාපති වරයාගේ පිළිතුරු කතාවෙන් අනතුරුව මන්ත්‍රීවරුන්ගේ නමින් ඡන්දයක් විමසීය.

එහිදී අයවැය යෝජනාවට පක්ෂව ඡන්ද 18 කුත් යෝජනාවට විරුද්ධව ඡන්ද 21 කුත් ලැබී තිබිණ.

වාරියපොල ප්‍රාදේශීය සභාවේ සංයුතිය වනුයේ ශ්‍රී ලංකා පොදුජන පෙරමුණ මන්ත්‍රීවරු 23, එක්සත් ජාතික පක්ෂය 12, ශ්‍රී ලංකා නිදහස් පක්ෂය 03, ජනතා විමුක්ති පෙරමුණ 02 ශ්‍රී ලංකා මහජන පක්ෂය 01 වශයෙනි.