(මහින්ද නිශ්ශංක)

දුම්රිය රියදුරන්  අද (05) මධ්‍යම රාත්‍රීයේ සිට ක්‍රියාත්මක කිරීමට සිටි පැය 24 ක අසනීප නිවාඩු වාර්තා කිරීමේ වෘත්තීය ක්‍රියාමාර්ගය අත්හිටුවීමට තීරණය කළ බව ලෝකොමෝටිව් ඔපරේටින් ඉන්ජිනියර්ස් සංගමයේ ප‍්‍රධාන ලේකම් ඉන්දික දොඩම්ගොඩ මහතා පැවසීය.

අග්‍රාමාත්‍ය මහින්ද රාජපක්‍ෂ මහතා සමඟ විජේරාම මාවතේ පිහිටි අග්‍රාමාත්‍ය නිල නිවසේදී අද රාත්‍රීයේ පැවැති විශේෂ සාකච්ඡාවක ප්‍රතිපලයක් ලෙස දුම්රිය වෘත්තීය ක්‍රියාමාර්ගය අත්හිටුවීමේ තීරණයට එළැඹි බව ඔහු පැවසීය.

මත්කුඩු ප‍්‍රවාහනය කිරීමට දුම්රිය රියදුරන් සහය දක්වන බවට ඇමති විමල් වීරවංශ මහතා කර ඇති ප්‍රකාශයකට විරෝධය දක්වා අද මධ්‍යම රාත්‍රීයේ සිට හෙට (06) මධ්‍යම රාත්‍රීය දක්වා මෙම වෘත්තීය ක්‍රියාමාර්ගය කි‍්‍රයාත්මක කිරීමට දුම්රිය රියදුරන් තීරණය කර තිබිණි.

අද රාත්‍රීයේ අග්‍රාමාත්‍ය මහින්ද රාජපක්‍ෂ මහතා සමඟ පැවැති මෙම සාකචඡාවේදී විමල් වීරවංශ මහතා කර ඇති ප‍්‍රකාශය සම්බන්ධව හෙට (06) දිනයේ ප‍්‍රකාශයක් සිදුකරන බවට අග්‍රාමාත්‍ය මහින්ද රාජපක්‍ෂ මහතා  පොරොන්දු වු බවද සංගමයේ ලේකම් ඉන්දික මහතා පැවසීය.

මෙම සාකච්ඡාවේදී අගමැතිවරයාගෙන් සාධනීය විසඳුමක් ලැබුණු බවත් එසේම දුම්රිය ප්‍රමාදය ඇතුළු ගැටළු වලට විසඳුම් ලබාදෙන බවටත් පොරොන්දු වු බවත් ඒ මහතා වැඩිදුරටත් පැවසීය.