(ඩයනා උදයංගනී)

දිවයිනේ පුරා දිස්ත්‍රික්ක කිහිපයක මාස ගණනාවක් තිස්සේ පවතින දැඩි වියළි හා සුළං සහිත කාලගුණ තත්ත්වය හේතුවෙන් පවුල් 75,560 කට අයත් පුද්ගලයින් 3,01,243 දෙනකු පීඩාවට පත්ව සිටින බව ආපදා කළමනාකරණ මධ්‍යස්ථානය පවසයි.

දිවයිනේ දිස්ත්‍රික්ක 7කට අයත් ප්‍රාදේශීය ලේකම් කොට්ඨාශ 27ක ජනතාව මෙයින් දැඩි පීඩාවට පත්ව සිටින බව එම මධ්‍යස්ථානයේ සහකාර අධ්‍යක්‍ෂ (මාධ්‍ය) ප්‍රදීප් කොඩිප්පිලි මහතා ලංකාදීපයට පැවසීය.

බදුල්ල, කෑගල්ල, රත්නපුර, මහනුවර, කළුතර, ගම්පහ සහ පුත්තලම යන දිස්ත්‍රික්කයන්හි ජනතාව මෙලෙස පීඩාවට පත්ව සිටින බවද කොඩිප්පිලි මහතා සඳහන් කළේය.

මෙයින් වැඩිම පීඩාවකට පත්ව සිටින්නේ කළුතර දිස්ත්‍රික්කයේ ජනතාව වන අතර කළු ගඟේ ජල මට්ටම පහළ ගොස් එයට ලවණ මුසුවීම හේතුවෙන් එම දිස්ත්‍රික්කයේ කළුතර, බේරුවල, පානදුර හා දොඩංගොඩ යන ප්‍රදේශීය ලේකම් කොට්ඨාශ කිහිපයක පවුල් 50,497 කට අයත් 2,12,728 දෙනෙක් පානීය ජල ගැටලුවකට මුහුණ පා සිටින බව ද ඔහු ප්‍රකාශ කළේය.

එම දිස්ත්‍රික්කයේ මිල්ලනිය, මතුගම හා හොරණ ප්‍රාදේශීය ලේකම් කොට්ඨාසයන්හි පවුල් 723 කට අයත් 2797 දෙනෙක් ද ඇතුළුව දිස්ත්‍රික්කය පුරා පවුල් 53,157 කට අයත් 2,15,525 දෙනෙක් වියළි කාලගුණයෙන් පීඩාවට පත්ව සිටින බව කොඩිප්පිලි මහතා කීවේය.

ඊට අමතරව පුත්තලම දිස්ත්‍රික්කයේ පවුල් 9,792 කට අයත් 31,425 දෙනෙක්, රත්නපුර දිස්ත්‍රික්කයේ පවුල් 8,150කට අයත් 30,497දෙනෙක්, කෑගල්ල දිස්ත්‍රික්කයේ පවුල් 2,510කට අයත් 9,517 දෙනෙක්, ගම්පහ දිස්ත්‍රිකක්යේ පවුල් 1,982කට අයත් 6,566 දෙනෙක් සහ මහනුවර දිස්ත්‍රික්කයේ පවුල් 350කට අයත් 1,213 දෙනෙක් මෙලෙස වියළි කාලගුණයෙන් පීඩාවට පත්ව සිටින බව හෙතෙම සඳහන් කළේය.

මේ අතුරින් පානීය ජල ගැටලු පවතින ප්‍රදේශවල ජනතාවට ජල බවුසර් හා ටැංකි යොදාගනිමින් ජලය සැපයීමට පියවර ගෙන ඇතැයි ද කොඩිප්පිලි මහතා කීවේය.