(බිඟුන් මේනක ගමගේ)  

බම්බලපිටිය රාමනාදන් විදුහලේ හිටපු විදුහල්පතිනියට එරෙහිව රාජ්‍ය සේවා කොමිසමෙන් හා අල්ලස් හෝ දූෂණ චෝදනා විමර්ශන කොමිසමෙන් විමර්ශන ආරම්භ වී තිබියදී අධ්‍යාපන අමාත්‍යාංශයේ දෙමළ මාධ්‍ය නියෝජ්‍ය අධ්‍යක්ෂ තනතුරට ඇය පත්කර ඇතැයි ලංකා ගුරු සංගමය අධ්‍යාපන සේවා කමිටුවට පැමිණිල්ලක් කර ඇත.

පාසලට ළමයින් ඇතුලත් කරගැනීමේදී මුදල් ලබාගැනීමේ සිදුවීමක් ඇතුලු චෝදනා කීපයක් මත හිටපු විදුහල්පතිනි කෝදෙයි නගුලරාජා මහත්මියට එරෙහිව මෙම විමර්ශන ආරම්භ කර ඇතැයි ද එවැනි පසුබිමක ඇයට අධ්‍යාපන අමාත්‍යාංශයේ නියෝජ්‍ය අධ්‍යක්ෂ තනතුරක් ලබාදීම නීතියටත් සදාචාරයටත් අනුකූල නැතැයි කියමින් ලංකා ගුරු සංගමය මෙම පැමිණිල්ල කර ඇත.

විනය චෝදනා මත චෝදනා පත්‍රයක් ලබා දී මූලික විමර්ශනයක් කර ඇති අවස්ථාවක මෙවැනි තනතුරක් දිය නොහැකි යැයි ද එය ආයතන සංග්‍රහය උල්ලංඝනය කිරීමකැයි ද ලංකා ගුරු සංගමය කළ පැමිණිල්ලේ සඳහන් වේ.

මේ සම්බන්ධයෙන් කළ විමසීමේදී අධ්‍යාපන අමාත්‍යාංශයේ අතිරේක ලේකම් එම්.සලාහුදීන් මහතා ‘ලංකාදීප’ යට පැවැසුවේ අධ්‍යාපන අමාත්‍යාංශය නිරන්තරයෙන්ම රාජ්‍ය සේවා කොමිසමේ උපදෙස් මත ක්‍රියා කරන බවත් වැඩ තහනම් කර නොමැති අවස්ථාවක චෝදනා එල්ල වී ඇති රාජ්‍ය නිලධාරියකු වෙනත් තනතුරක පිහිටුවා වැඩක් ගැනීම වරදක් නොවන බවත්ය.

රාජ්‍ය සේවා කොමිසමෙන් කළ විමසීමේදී එහි ජ්‍යෙෂ්ඨ නිලධාරියකු පැවැසුවේ කොමිසම වෙත ඒ ගැන තවමත් කරුණු වාර්තා නොමැති බැවින් ඒ ගැන සොයා බලන බවයි.