(සුජිත් හේවාජුලිගේ )

යුද්ධයේදී මියගිය ත්‍රිවිධ හමුදාවේ සියලුම රණවිරුවන් සිහිපත් කිරීම සඳහා එම මියගිය රණවිරුවන්ගේ සංඛ්‍යාවට සමාන විවිධ පැළ වර්ග විසි පන් දහස් නවසිය තිහක් (25,930) වනජීවී රාජ්‍ය අමාත්‍ය විමලවීර දිසානායක මහතාගේ මූලිකත්වයෙන් පුත්තලම කරුවලගස්වැව ප්‍රාදේශීය ලේකම් කොට්ඨාශයේ ඉපලෝගම ප්‍රදේශයේ පසුගියදා රෝපණය කෙරිණ.

ආරංචි මාර්ග සඳහන් කරන අන්දමට පැළ වර්ග මෙපමණ සංඛ්‍යාවක් එකවර රෝපණය කෙරුණු මෙරට පළමු අවස්ථාව මෙයයි.

වනජීවී රාජ්‍ය අමාත්‍යාංශය, ත්‍රිවිධ හමුදාව සහ රණවිරු සේවා අධිකාරිය මෙම වැඩපිළිවෙල සංවිධානය කළේය.

ඉපලෝගම ප්‍රදේශයේ මෙසේ රෝපණය කර ඇත්තේ ස්ථිරසාර වනාන්තරයකට අවශ්‍ය වන පැළ වර්ගයන්ය.

මේ සම්බන්ධයෙන් අදහස් දක්වන වනජීවී රාජ්‍ය අමාත්‍ය විමලවීර දිසානායක මහතා පැවසුවේ යුද්ධයේදී මියගිය ත්‍රිවිධ හමුදා රණවිරුවන් සිහි කිරීම සහ ඔවුන් මව්බිමේ නිදහස වෙනුවෙන් දැක්වූ දායකත්වයට කෘතවේදිත්වය පළ කිරීම සඳහා මෙම වැඩපිළිවෙල ක්‍රියාත්මක කළ බවයි.

මෙවැනි වැඩසටහන් ඉදිරියේදී තවත් ක්‍රියාත්මක කිරීමට තමා බලාපොරොත්තු වන බවද හෙතෙම සඳහන් කළේය.

වනජීවී රාජ්‍ය අමාත්‍ය විමලවීර දිසානායක මහතා පළමු පැළය එහි රෝපණය කළේය.

මේ අවස්ථාවට රාජ්‍ය අමාත්‍ය සනත් නිශාන්ත, වනජීවී රාජ්‍ය අමාත්‍යාංශයේ ලේකම් මේජර් ජෙනරාල් පාලිත ප්‍රනාන්දු යන මහත්වරුන් ඇතුළු නිලධාරීහු පිරිසක්ද සහභාගී වූහ.