(නිමල කොඩිතුවක්කු)
 
උසස්වීම් ලබානොදීම ඇතුළු ගැටලූ කිහිපයක් මුල්කර ගනිමින් විදුහල්පතිවරුන්  4000ක සහභාගීත්වයෙන් රාජ්‍ය පරිපාලන අමාත්‍යාංශය ඉදිරිපිට හෙට (6) පෙරවරු 10.00 සිට දැවැන්ත විරෝධතාවයක් සිදුකරන බව ලංකා ගුරු සංගමයේ ලේකම් ජෝෂප් ස්ටාලින්  මහතා සඳහන් කරයි.

විරෝධතාවයෙන් තම ගැටලූ සඳහා විසඳුමක් නොලැබුණහොත් අඛණ්ඩ වෘත්තීය ක්‍රියාමාර්ගයකට යොමු වන බවද ඔහු සඳහන් කළේය.

2009 න් පසුව විදුහල්පති සේවයට එක්ව සිටින 4000කට ආසන්න පිරිසක් සඳහා උසස්වීම් වලට ප‍්‍රධාන බාධාවක් බවට පත්ව ඇත්තේ දෙමළ භාෂාව සමත්වීම බවත් ඒ සම්බන්ධයෙන් සහනයක් ලබාදෙන බවට රජය එකඟ වූ නමුත් එයට අදාළ චක‍්‍රලේඛ නිකුත් නොකිරිම නිසා මෙම විරෝධතාවය ක‍්‍රියාත්මක කරන බවත් ස්ටාලින් මහතා පැවසීය.

දෙමළ භාෂාව සමත්වීමට සහනයක් ලබාදෙන බවට ජාතික ඒකාබද්ධතා, රාජ්‍ය භාෂා සහ හින්දු ආගමික කටයුතු අමාත්‍ය  මනෝ ගනේෂන්, රාජ්‍ය පරිපාලන හා ආපදා කළමනාකරණ අමාත්‍ය රංජිත් මද්දුමබණ්ඩාර යන මහත්වරුන් එකඟතාවය පලකර ඇති බවත් ඔහු පැවැසිය.

එහෙත් එයට අදාළ චක‍්‍රලේඛය මෙතෙක්  නිකුත් නොකිරීමෙන්  විදුහල්පතිවරුන්  4000ක් සඳහා පළමු පන්තියට උසස්වීම් ඇන හිට ඇති බවද හෙතෙම සඳහන් කළේය.

මේ හේතුවෙන් එම පිරිසට වෙනත් උසස්විම් සඳහා ඉදිරිපත් විමට නොහැකි වීමෙන් බලවත් අසරණතාවයකට පත්ව ඇති බවද ජොෂප් ස්ටාලින් මහතා වැඩිදුරටත් පැවසීය.