(තිළිණි ද සිල්වා සහ රංජන් කටුගම්පොළ)
 
 
අධිකරණයට අපහාසයක් සිදු කළ බවට චෝදනා කරමින් සයිටම් පෞද්ගලික වෛද්‍ය විද්‍යාලයේ වෛද්‍ය උපාධිධාරි සිසුවියක විසින් ශ්‍රී ලංකා වෛද්‍ය සභාවට එරෙහිව ගොනු කර ඇති පෙත්සම ලබන  30 වැනිදා සළකා බැලීමට  අභියාචනාධිකරණය අද (16) තීන්දු කළේය. 
 
දිල්මි සූරියආරච්චි නම් අදාළ සිසුවිය ඉදිරිපත් කළ පෙත්සම අභියාචනාධිකරණ සභාපති   ප්‍රීති පද්මන් සූරසේන සහ විනිසුරු අර්ජුන ඔබේසේකර යන විනිසුරු මඩුල්ල හමුවේ අද(16) කැඳවනු ලැබීය.
  
මීට පෙර අධිකරණය විසින් නිකුත් කරනු ලැබී නොතීසි අනුව  පෙත්සමේ වගඋත්තරකරුවන් ලෙස නම් කර සිටින ශ්‍රී ලංකා වෛද්‍ය සභාවේ සාමාජිකයින් අධිකරණය හමුවේ පෙනී සිටියේය.
 
ඔවුන් වෙනුවෙන් පෙනී සිටි  ජනාධිපති නීතිඥ මනෝහාර දසිල්වා මහතා අධිකරණයට  දැනුම් දුන්නේ මෙම පෙත්සම සම්බන්ධයෙන් මූලික විරෝධතා ඉදිරිපත් කිරීමට තම සේවාදායකයින් අපේක්ෂා කරන බවයි. 
 
ඒ අනුව පෙත්සම ලබන 30  කැදවීමට අභියාචනාධිකරණය නියම කළ අතර පෙත්සම සම්බන්ධයෙන් විරෝධතා ඇත්නම් ඒවා දිනට අධිකරණය හමුවේ ගොනු කරන ලෙසද අභියාචනාධිකරණය වගඋත්තරකාර ශ්‍රී ලංකා වෛද්‍ය සභාවේ සාමාජිකයන්ට නියම කළේය.
 
පෙත්සම්කාර සිසුවිය සිය පෙත්සමෙන් පෙන්වා දී ඇත්තේ සයිටම් ආයතනයේ වෛද්‍ය උපාධිය සම්පූර්ණ කර ඇති තමන් ශ්‍රී ලංකා වෛද්‍ය සභාවේ ලියාපදිංචි කරන ලෙසට අභියාචනාධිකරණය ඉකුත් 2017 වසරේ ජනවාරි මස 30 වැනි දා වෛද්‍ය සභාවට නියෝගයක් නිකුත් කළ ද එම නියෝගය ප්‍රකාරව තමන්ව ලියාපදිංචි කිරීම ශ්‍රී ලංකා වෛද්‍ය සභාව ප්‍රතික්ෂේප කරමින් සිටින බවයි. එමගින් අධිකරණයට අපහාසයක් සිදුව ඇති බවද එම සිසුවිය සිය පෙත්සමින් පෙන්වා දේ.