(ඩයනා උදයංගනී)

ශ්‍රී ලංකාවේ නර්තන කලාව ජාත්‍යන්තරයට ගෙන ගිය අග්‍රගණ්‍ය  නර්තන ශිල්පිනියක වන ආචාර්ය වජිරා චිත්‍රසේන මහත්මියට ඉන්දීය රජයෙන් පිරිනැමුණු “පද්ම ශ්‍රී සම්මානය” ඇයට පිළිගැන්වීම අරලියහහ මන්දිරයේ දී අද (17) සිදුකෙරිණි.

ඒ අග්‍රාමාත්‍ය මහින්ද රාජපක්ෂ මහතාගේ සහ ශ්‍රී ලංකාවේ ඉන්දීය මහ කොමසාරිස් එච්.ඊ.ගෝපාල් බග්ලේ මහතාගේ ප්‍රධානත්වයෙන් අරලියගහ මන්දිරයේ පැවති චාම් උත්සවයකදීය.

ඉන්දීය රජය මගින් පිරිනමන ඉහළම සිවිල් ගෞරව සම්මානයක් වන පද්ම ශ්‍රී සම්මානලාභීන්ගේ ලේඛනය වාර්ෂිකව එරට ජනරජ දිනයේදී ප්‍රකාශයට පත්කෙරේ.

2020 වසරේදී පද්ම ශ්‍රී සම්මානලාභීන් අතරට ශ්‍රී ලාංකික කාන්තාවන් දෙදෙනකුගේ නම් ඇතුළත් වූ අතර, කලා ක්ෂේත්‍රයට ඉටුකළ මෙහෙවර උදෙසා ආචාර්ය වජිරා චිත්‍රසේන සහ  සාහිත්‍ය හා අධ්‍යාපන ක්ෂේත්‍රයට ලබාදුන් දායකත්වය වෙනුවෙන් මහාචාර්ය ඉන්ද්‍රා දසනායක (නැසීගිය) යන මහත්මීහු  එම සම්මානයට උරුමකම් කීහ.

මෙම සම්මාන ප්‍රදානය කිරීම ඉන්දීය ජනාධිපති ශ්‍රී රාම්නාත් කෝවින්ද් මහතා අතින් නවදිල්ලියේ පිහිටි රාෂ්ට්‍රපති භවන් හිදී ඉකුත් 08 වැනිදා සිදුකෙරුණු අතර මහාචාර්ය ඉන්ද්‍රා දසනායක මහත්මිය වෙනුවෙන්  ඇගේ දියණිය වන වත්සලා දසනායක ඉෂ්ටවීර මෙනවිය එහි ගොස් ඉන්දීය ජනාධිපතිවරයා අතින් “පද්ම ශ්‍රී සම්මානය “ලබාගත්තාය.

එම සම්මාන ප්‍රදානෝත්සවයට සහභාගීවීමට නොහැකි වූ වජිරා චිත්‍රසේන මහත්මියට හිමි සම්මානය මෙලෙස ප්‍රදානය කෙරිණි.

හෙළයේ මහා ගාන්ධර්ව ආචාර්ය පණ්ඩිත් ඩබ්ලිව්. ඩී. අමරදේව මහතාද 2002 වසරේදී පද්ම ශ්‍රී සම්මානයෙන් පිදුම් ලැබීය.