( තිළිණි ද සිල්වා  සහ  රංජන් කටුගම්පොල )

උතුරු පළාත් හිටපු අමාත්‍ය බී.ඩෙනීෂ්වරන් මහතාගෙන් තමා කිසි විටෙක සමාව ගැනීමට කිසිදු ආකාරයේ සූදානමක් නොමැති බව දෙමළ ජාතික සභාවේ නායක, යාපනය දිස්ත්‍රික් පාර්ලිමේන්තු මන්ත්‍රී සී.වී.විග්නේෂ්වරන් මහතා අද (15) අභියාචනාධිකරණයට දැනුම් දුන්නේය.

අභියාචනාධිකරණ තීන්දුවක් ක්‍රියාත්මක නොකිරීමෙන් අධිකරණයට අපහාස කිරීම සම්බන්ධයෙන් උතුරු පළාත් ප්‍රධාන අමාත්‍ය සහ හිටපු ශ්‍රේෂ්ඨාධිකරණ විනිසුරුවරයකු වූ සී.වී. විග්නේශ්වරන් මහතාට එරෙහිව ගොනුකර ඇති පැමිණිල්ල අද අභියාචනාධිකරණය හමුවේ කැඳවූ අතර එහිදී ඒ මහතා වෙනුවෙන් පෙනී සිටි ජනාධිපති නීතීඥ ඊ.කනඊස්වරන් මහතා මේ බව අභියාචනාධිකරණයට දන්වන ලදී.

ඒ අනුව පාර්ලිමේන්තු මන්ත්‍රී සී.වී.විග්නේෂ්වරන් මහතා උතුරු පළාත් මහ ඇමැතිවරයාව සිටියදී අධිකරණයට අපහාසයක් සිදුකර ඇති බවට චෝදනා කරමින් උතුරු පළාත් සභාවේ හිටපු ඇමැතිවරයකු වන බී.ඩෙනීෂ්වරන් මහතා ගොනු කළ පැමිණිල්ල විභාගයට ගැනීමටද අභියාචනාධිකරණය අද (15) තීන්දු කළේය.

මෙම පැමිණිල්ල සම්බන්ධ චෝදනාවන්ට විත්තිකරුවන් නිවැරදි බවද එහිදී ඔවුන් වෙනුවෙන් පෙනී සිටි නීතීඥවරු අධිකරණය හමුවේ ප්‍රකාශ කළහ.

මෙම පැමිණිල්ල මහින්ද සමයවර්ධන සහ ප්‍රියන්ත ප්‍රනාන්දු යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල හමුවේ විභාගයට ගැණුනි.

මෙම පැමිණිලි විභාගයේදී උතුරු පළාත් හිටපු අමාත්‍ය බී.ඩෙනීෂ්වරන් මහතා වෙනුවෙන් පෙනී සිටි නීතීඥ සුරේන් ප්‍රනාන්දු මහතා කියා සිටියේ පළමු විත්තිකරු තම සේවදායකයාට යළි අමාත්‍ය ධූරය ලබා නොදීම පිළිබඳව අධිකරණය හමුවේ සමාව ප්‍රකාශ කරන්නේ නම් පැමිණිල්ල ඉල්ලා අස්කර ගැනීමට තම සේවාදයකයා සූදානම් බවය.

ඊට විරෝධය පළ කළ පළමු විත්තිකාර විග්නේෂ්වරන් මහතා වෙනුවෙන් පෙනි සිටි ඊ.කනඊශ්වරන් මහතා කියා සිටියේ තම සේවාදායකයා කිසිවිටෙකවත් සමාව අයැදීමට සූදනාම් නොවන බවත් , පැමිණිල්ල විභාගයට ගන්නැයි තමන් ඉල්ලා සිටින බවය.

ඒ අනුව පැමිණිල්ල විභාගයට ගැනීමට තීරණය කළ අභියාචනාධිකරණ විනිසුරු මඩුල්ල පැමිණිල්ලේ පළමු සාක්කිකරු වන උතුරු පළාත් ප්‍රධාන ලේකම් අන්තෝනිපිල්ලේ පද්මනාදන් මහතා සාක්කියට කැඳවීය.

එහිදී උතුරු පළාත් ප්‍රධාන ලේකම්වරයා කියා සිටියේ අධිකරණ නියෝගයෙන් පසුවත් ඩී.ඩෙනීෂ්වරන් හිටපු අමාත්‍යවරයාගේ අමාත්‍ය ධූරවල කටයුතු කරනු ලැබුවේ පළමු විත්තිකරු බවයි.පැමිණිල්ල පිළිබඳ වැඩිදුර විභාගය අදට (16) කල් තැබිණි.

උතුරු පළාත් මහ ඇමැති වෙනුවෙන් ජනාධිපති නීතීඥ ඊ .කන ඊශ්වරන්ද , උතුරු පළාත් අමාත්‍ය බී.ඩෙනීෂ්වරන් වෙනුවෙන් නීතීඥ සුරේන් ප්‍රනාන්දු මහතාද පෙනී සිටියහ.