(ශාන්ත ප්‍රදීප් කුමාර කුලරත්න)

හෝමාගම බිම් ඇතුරුම් ගල් කර්මාන්ත ශාලාවක ගබඩාවකින්  රුපියල් ලක්ෂ 27 ක්  වටිනා  බිම් ඇතුරුම් ගල් තොගයක් සොරාගත් , පුද්ගලයින් දෙදෙනකු , අත්අඩංගුවට ගත් බව හෝමාගම මූලස්ථාන පොලිසිය පවසයි .
මෙසේ අත්අඩංගුවට ගෙන ඇත්තේ හෝමාගම පිංකෙත පාර ප්‍රදේශයේ පදිංචි  "ධම්මා" සහ තවත් පුද්ගලයකු බව පොලීසිය කියයි.

විදේශ රටවලින් මෙරටට ආනයනය කරන බිම් ඇතුරුම් ගල් සහ මෙරට කළු ගල් ඔප දමා නිෂ්පාදනය කරන බිම් ඇතුරුම් ගල් ගබඩා කර තිබූ, හෝමාගම ගැමුණු මාවත  ප්‍රදේශයේ ගබඩාවකින්, මෙම සැකකරුවන් දෙදෙනා ඉකුත් මාසයේ අවස්ථා කිහිපයකදී  රුපියල් ලක්ෂ 27 කට ආසන්න ටයිල් තොගයක් සොරාගෙන තිබුණි .

ඒ අනුව ලද පැමිණිල්ලකට අනුව විමර්ශන සිදු කරමින් සිටියදී , ඉතා වටිනා බිම් ඇතුරුම් ගල් තොගයක් ඉතා අඩු මිලට විකුණන බවට  බස්නාහිර පළාත් බුද්ධි කොට්ඨාශයේ නිලධාරීන්ට තොරතුරක් ලැබී තිබූණි .

ඒ අනුව එම බිම් ඇතුරුම් ගල් අලෙවිකළ බව පැවසෙන පුද්ගලයින් දෙදෙනෙකු හෝමාගම පිංකෙත පාර ප්‍රදේශයේදී අත්අඩංගුවට ගෙන වැඩිදුර ප්‍රශ්න කිරීමේදී සොරාගත් බිම් ඇතුරුම් ගල් 190 ස්ථාන පහකට  අලෙවි කර තිබියදී සොයාගත් බව පොලිසිය පවසයි .

රුපියල් 10.000  පමණ වටිනා බිම් ඇතුරුම් ගල් අලෙවි කර තිබුණේ රුපියල් 1000 වැනි සුළු මුදලකට  බවත් රුපියල් 8000 බිම් ඇතුරුම් ගල් අලෙවි කර තිබුණේ රුපියල් 500 බවත් මේ තුළින්  උපයාගත් මුදලින් සැකකරුවන් දෙදෙනා හෙරොයින් පානය කර ඇති බවත් පොලිසිය කියයි .

ඒ අනුව අත්අඩංගුවට ගත් සැකකරුවන් හෝමාගම අධිකරණයට ඉදිරිපත් කිරීමට නියමිතය.

සිද්ධිය සම්බන්ධයෙන් හෝමාගම මූලස්ථාන පොලිසියේ ප්‍රධාන පොලිස්  පරීක්ෂක  ප්‍රේමලාල් මහතාගේ උපදෙස් මත, අපරාධ විමර්ශන අංශයේ ස්ථානාධිපති ප්‍රධාන පොලිස් පරීක්ෂක  කාරියවසම් මහතාගේ මෙහෙයවීමෙන් , පො.සැ (58226) රාජපක්ෂ , පො.කො (21072) මාෂල් , (79159) ප්‍රනාන්දු , (83795) හරිස්චන්ද්‍ර , සහ බස්නාහිර පළාත් බුද්ධි කොට්ඨාශයේ  වැටලීම සිදුකොට ඉදිරි පරීක්ෂණ පවත්වති.