(ඩී.කේ.රත්න)

රුපියල් ලක්ෂ 20 ක් පමණ වටිනාකමකින් යුත් ගංජා කිලෝ ග‍්‍රෑම් 68 ක් කැබ් රථයකින් ප‍්‍රවාහනය කරමින් සිටි පුද්ගලයකු අද (20) තණමල්විල කහකුරුල්ලන්පැලැස්ස දී පොලිස් විශේෂ කාර්ය බළකායේ නිලධාරීන් විසින් අත්අඩංගුවට ගනු ලැබීය.

ගැනුම්කරුවකුට අලෙවි කිරීම සඳහා මෙම පුද්ගලයා මෙම ගංජා තොගය බොලේරෝ වර්ගයේ කැබ් රථයකින් ප‍්‍රවාහනය කිරීමේදී කැබ් රථයත් සමඟ පොලිස් විශේෂ කාර්ය බළකායට කොටුවී ඇත.

තණමල්විල කහකුරුල්ලන්පැලැස්ස ප‍්‍රදේශයේ පුද්ගලයකු ගංජා තොගයක් ප‍්‍රවාහනය කරන බවට සූරියවැව පොලිස් විශේෂ කාර්ය බළකායේ නිලධාරීන්ට ලැබුණු තොරතුරක් මත සිදු කළ විශේෂ සෝදිසි මෙහෙයුමකදී මෙම පුද්ගලයා ගංජා සමඟ අත්අඩංගුවට ගෙන ඇත.

අත්අඩංගුවට ගනු ලැබූ පුද්ගලයා ගංජා තොගය සහ කැබ් රථය සමග තණමල්විල පොලීසියට බාරදී තිබේ.

සැකකරු වැල්ලවාය මහේස්ත‍්‍රාත් අධිකරණයට ඉදිරිපත් කිරීමට නියමිතය.