(නිමල කොඩිතුවක්කු)

රට ගිනි තියන පනත් වත්මන් යහපාලන ආණ්ඩුව ඉදිරිපත් කරමින් සිටින බව පාර්ලිමේන්තු මන්ත‍්‍රී සිසිර ජයකොඩි මහතා කොළඹදී අද (19) පැවැසීය.

ප‍්‍රජාතන්ත‍්‍රවාදය පිලිබඳ අබමල් රේණුවක හෝ  හැඟිමක් ඇති පිරිස් මෙම පනත් පරාජය කිරීමට ඉදිරිපත් විය යුතුව ඇතැයිද මන්ත‍්‍රීවරයා සඳහන් කළේය.

විපක්ෂනායක කාර්යාලයේ පැවති මාධ්‍ය හමුවකට එක්වෙමින් ඔහු මේ බව පැවැසීය.

එහිදි වැඩිදුරටත් අදහස් දැක්වූ පාර්ලිමේන්තු මන්ත‍්‍රී සිසිර ජයකොඩි මහතා මෙසේද කීය.

       ‘‘රට ගිනි තියන පනත් අද ආණ්ඩුව ඉදිරිපත් කරමින් සිටිනවා.  ත‍්‍රස්තවාදය වැළැක්වීම පිලිබඳ රජය අළුතින් හඳුන්වාදුන් පනත 2018 වසරේ සැප්තැම්බර් 17 ඉදිරිපත් කළා. ඔක්තෝම්බර් මාසයේ  සිදුවූ දේශපාලන පරිවර්ථනයත් සමඟ එම පනත සම්මත කරගැනීමට ඔවුන්ට නොහැකි වූනා.

ජිනීවා මානව හිමිකම් සමුළුව රැස්වීමට පෙර ආණ්ඩුව යළිත් මෙම පනත සම්මත කර ගැනීමට උත්සාහයක් දරනවා. ත‍්‍රස්තවාදය වැළැක්වීමේ පනත කියලා නම් තැබුවට මේය ත‍්‍රස්තවාදය වැළැක්වීමේ පනත නෙමෙයි.

ත‍්‍රස්තවාදයට නිදහස දෙන රජයට එරෙහිව අරගල කරන වෘත්තිය සමිතිවලට, ශිෂ්‍යයන්ට, වැඩකරන  ජනතාවට එරෙහිව පාවිච්චි කරන පනතක් බවට මෙම පනත හදුන්වා දෙන්න පුළුවන්.  ප‍්‍රජාතන්ත‍්‍රවාදය පිලිබඳ අබමල් රේණුවක හෝ  හැඟිමක් තියෙන කිසිම කෙනෙකුට මේ පනතට පක්ෂ වෙන්න කිසිදු හැකියාවක් නැහැ’’ යැයිද ඔහු එහිදී පැවැසීය.