(සුජිත් හේවාජුලිගේ සහ අංජුල මහික වීරරත්න)

යහපාලන රජය සමයේදී මිනිස් පරිභෝජනයට සුදුසු හොඳ තත්වයේ පැවති වී මෙට්‍රික් ටොන් 88615 සත්ව ආහාර ලෙස අඩු මිලට විකිණීමෙන් රුපියල් කෝටි 250 කට ආසන්න පාඩුවක් සිදුවී ඇතැයි කෘෂිකර්ම අමාත්‍ය මහින්දානන්ද අලුත්ගමගේ මහතා පාර්ලිමේන්තුවේ දී අද පැවැසීය.

මේ සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව පරීක්ෂණයක් අරඹා ඇතැයිද ඇමැතිවරයා සඳහන් කළේය.

ඔහු මෙසේ පැවසුවේ අනුරාධපුර දිස්ත්‍රික් මන්ත්‍රී කේ පී කුමාරසිරි මහතා(පො.පෙ) ඇසූ ප්‍රශ්නයකට පිළිතුරු දෙමිනි.

මෙය එම රජය සමයේ සිදු වූ බරපතළ වංචාවක් බවද ඔහු පැවසුවේය.

වී කිලෝව රුපියල් 24 ට සත්ව ආහාර සඳහා මෙසේ විකුණා ඇත්තේ වී අලෙවි මණ්ඩලයේ කිසිදු අනුමැතියකින් තොරව බව පැවසූ අලුත්ගමගේ මහතා එවකට රජයේ ඇමතිවරයා ඇතුළු රජය මේ සඳහා වගකිව යුතු බවද සඳහන් කළේය .