(බිඟුන් මේනක ගමගේ) 

 
මහවැලි උපදේශක සේවා කාර්යාංශය ඈවර කිරීමට ජනාධිපතිවරයා තීරණය කර ඇති බවට ශ්‍රී ලංකා මහවැලි අධිකාරිය විසින් සිය කාර්යාංශ නිලධාරින්ට දැනුම් දෙනු ලැබ ඇතැයි එහි නිලධාරියෙක් ‘ලංකාදීප’ යට පැවැසීය.
 
 ඒ අනුව ගණන් බේරා වසා දමා සමාගම සතු වත්කම් ශ්‍රී ලංකා මහවැලි අධිකාරියට පවරාගැනීමට නියමිත යැයි ද විශේෂ කමිටුවක් විසින් ඉදිරිපත් කරන ලද වාර්තාවකින් පසුව ජනාධිපතිවරයා මෙම තීරණය ගෙන ඇති බව දැනුම් දී ඇතැයි ද එම නිලධාරියා කීය.
 
 
මෙම දැනුම්දීම නිසා ඇතැම් ආයතන සමග එළැඹ තිබූ ගිවිසුම්ගත ව්‍යාපෘති රැසක්ම අතරමග නතර කිරීමට සිදුව ඇතැයි ද ඔහු සඳහන් කළේය.
 
 මහවැලි උපදේශක සේවා කාර්යාංශ සේවක මණ්ඩලය සම්බන්ධයෙන් ගන්නා පියවර මේ වනතුරු දැනුම් දී නැති නමුත් සමාගම වසාදැමීමට අදාළ කැබිනට් පත්‍රිකාවක් ඉදිරිපත් කිරීමට නියමිතව ඇතැයි ද ඔහු පැවසීය.
 
 සමාගම් අධ්‍යක්ෂ මණ්ඩලය ද පසුගිය කාලයේ ඉල්ලා අස් වී යැයි කී හෙතෙම සැකකටයුතු
 ආකාරයට සිදු වූ මූල්‍ය ගනුදෙනුවක් ඊට හේතු යැයි ද කීවේය.
 
 ආයතනය ලාභ ලබන තත්ත්වයේ පැවතියේ යැයි ද වසා දැමීමට කිසිදු හේතුවක් නැතැයි ද එම නිලධාරියා වැඩිදුරටත් සඳහන් කළේය. 
 
 මහවැලි අධිකාරියට අනුබද්ධිත සමාගමක් වන මහවැලි උපදේශක සේවා කාර්යාංශය මහවැලි සංවර්ධන හා පරිසර අමාත්‍යංශය යටතේ පවතී.