(තිළිණි ද සිල්වා)

ජනාධිපති පරීක්ෂණ කොමිසන් සභාව හමුවේ විභාගයට ගැනෙන මහපොළ උසස් අධ්‍යාපන භාරකාර අරමුදල සතුව සිදුවී ඇතැයි කියන රුපියල් කෝටි ගණනක දූෂණ හා වංචා සිද්ධීන් පිළිබඳව ඉදිරිපත්ව ඇති පැමිණිල්ලට අදාළව හිටපු අගවිනිසුරු කේ.ඒ.ශ්‍රී පවන් මහතාගෙන්  ප‍්‍රකාශයක් ලබා ගැනීමට එම කොමිසමේ පොලිස් ඒකකයේ නිලධාරීන් කණ්ඩායමක් හෙට (26) හිටපු අගවිනිසුරුවරයාගේ වැල්ලවත්තේ පිහිටි නිවසට යෑමට නියමිත බව එම කොමිසම සඳහන් කරයි.

එම පැමිණිල්ලට අදාළ 2015 ‐ 2018  කාල සීමාවේ මහපොළ උසස් අධ්‍යාපන භාරකාර අරමුදලේ සභාපති ධූරය නිලබලයෙන් බාර වූයේ හිටපු අගවිනිසුරු කේ.ශ්‍රී පවන් මහතාට හෙයින් මෙලෙස ඔහුගෙන් ප‍්‍රකාශයක් ලබා ගැනීමට කොමිසන් සභාව තීරණය කළ බවද එහි ප‍්‍රකාශයෙක් ලංකාදීපයට පැවසීය.

ඒ අනුව කොමිසමේ සහකාර පොලිස් අධිකාරිවරයා ඇතුළු කොමිසමේ කාර්ය මණ්ඩලයේ සාමාජිකයින් පිරිසක් හෙට (26) දින පෙරවරු 8.30 ට ඒ මහතාගේ නිවසට යෑමට නියමිතය.

මහපොළ උසස් අධ්‍යාපන භාරකාර අරමුදල සතුව සිදුවී ඇතැයි කියන රුපියල් කෝටි ගණනක දුෂණ හා වංචා සිද්ධීන් පිළිබඳව සාක්කි ගැනීම සඳහා හිටපු උසස් අධ්‍යාපන ඇමති හා පාර්ලිමේන්තු මන්ත‍්‍රී විජේදාස රාජපක්‍ෂ මහතා වත්මන් රාජ්‍ය සමයේ රජයේ ආයතනවල සිදුවූ වංචා සහ දුෂණ සිද්ධීන් සොයා බලන ජනාධිපති පරීක්‍ෂණ කොමිසම හමුවට මෙම පැමිණිල්ල ඉදිරිපත් කර තිබිණි.මෙම පැමිණිල්ල පිළිබඳ වැඩිදුර විභාගය පැවැත්වේ.