(පී.එම්. රාජපක්ෂ)

මහනුවර දකුණ ඩිපෝවේ කාර්ය මණ්ඩලයේ 20 දෙනෙකුට පමණ මේ වන විට කොවිඩ්-19 වෛරසය ආසාදනය වී තිබෙන බැවින් අද (06) මහනුවර දකුණ ඩිපෝව සම්පූර්ණයෙන්ම වසා දැමීමට කටයුතු කළ බව ප්‍රවාහන රාජ්‍ය අමාත්‍ය දිලුම් අමුණුගම මහතා සඳහන් කළේය.

මහනුවරදී අද (06) මාධ්‍ය හමුවක් කැඳවමින් මේ බව ප්‍රකාශ කළ ප්‍රවාහන රාජ්‍ය අමාත්‍යවයා මහනුවර දකුණු ඩිපෝවේ ඉංජිනේරු අංශයේ කාර්ය මණ්ඩලය අතර පළමුව කොවිඩ් වෛරසය පැතිර ගොස් ඇති බවත්, මේ වන විට රියදුරු හා කොන්දොස්තර මහත්වරුන් අතරටද වෛරසය ව්‍යාප්ත වී තිබෙන බවත් පැවසීය.

මහනුවර දකුණු ඩිපෝවේ සියලුම කාර්ය මණ්ඩලය හෙට (07) දින සිට පී.සී.ආර් පරීක්ෂණ වලට යොමුකරන බවත්, වෛරසය ආසාදනය වී නොමැති සේවක පිරිස සම්බන්ධ කරගනිමින් නැවතත් මගී ප්‍රවාහන කටයුතු ආරම්භ යථාතත්වයට පත්කරන බවත් දිලුම් අමුණුගම මහතා කීය.

මගී ජනතාවට අවදානමක් ඇති වන කිසිදු තීරණයකට නොඑළඹෙන බවත් මෙම මස 11 වැනිදා පාසල් ආරම්භ කිරීමට නියමිත බැවින් ඊට ප්‍රථමයෙන් මහනුවර දකුණු ඩිපෝවේ මගී ප්‍රවාහන කටයුතු ආරම්භ කිරීමට අපේක්ෂා කරන බවත් ප්‍රවාහන රාජ්‍ය අමාත්‍ය දිලුම් අමුණුගම මහතා තවදුරටත් පැවසුවේය.