(ඩයනා උදයංගනී)

ඇමතිවරයෙක් විවේචනය කිරීම හෝ අඩු පාඩුවක් පෙන්වාදීම වරදක් යැයි ශ්‍රී ලංකා පොදුජන පෙරමුණේ ලේකම්, පාර්ලිමේන්තු මන්ත්‍රී සාගර කාරියවසම් මහතා පවසන්නේ නම් මුලින්ම විනය පරීක්‍ෂණයක් කළ යුත්තේ ඔහුටම විරුද්ධව යැයි ශ්‍රී ලංකා පොදුජන පෙරමුණේ කොළඹ දිස්ත්‍රික් පාර්ලිමේන්තු මන්ත්‍රී ජගත් කුමාර සුමිත්‍රාරච්චි මහතා අද (20) පැවසීය.

ඉන්ධන මිල වැඩි කළ අවස්ථාවේ දී උදය ගම්මන්පිල ඇමතිවරයා වැරදි බවට ලිඛිතව ප්‍රකාශයක් නිකුත් කරමින් මාධ්‍ය සංදර්ශන පෙන්නුවේ සාගර කාරියවසම් මහතා බැවින් මුලින්ම ඔහුට එරෙහි පරීක්‍ෂණයකින් විනය පරීක්‍ෂණ ආරම්භ කිරීමට සිදුවන බව ද ජගත් කුමාර මහතා සඳහන් කළේය.

පක්‍ෂයේ වරදක් පෙන්වා දුන් විට වරද පෙන්වූ අයට එරෙහිව විනය පරීක්‍ෂණ පැවැත්වීම පරිණත නායකයකුගේ ලක්‍ෂණයක් නොවන  බව කී මන්ත්‍රීවරයා තමාට එරෙහිව විනය පරීක්‍ෂණයක් නොකරන බව පක්‍ෂයේ නායකයෙක් තමාට දැනුම් දී ඇතැයි ද කීවේය.

ජගත් කුමාර මහතා මේ බව පැවසුවේ කොළඹ දී අද (20) පැවති මාධ්‍ය හමුවක් අමතමිනි.

පාදුක්ක පොලිස් ස්ථානාධිපතිවරයා මාරු කර එතැනට ගාමිණී ලොකුගේ මහතාගේ අයකු පත්කරන බවත්, හිටපු ස්ථානාධිපතිවරයා මාරු කිරීම වරදක් බවත් මහජන ආරක්‍ෂක අමාත්‍ය, සරත් වීරසේකර මහතා තමා සමඟ පවසා ඇතැයි කී ජගත් කුමාර මහතා දැන් ඔහු ඒ සියල්ල වසා ගැනීමට තමාට අසත්‍ය චෝදනා එල්ල කරන බව ද කීවේය.

එවැනි චෝදනා එල්ල කරන්නේ නම් ඔවුන් පොලීසිය මෙහෙයවන්න උත්සාහ ගන්නා ආකාරය ද තමාට එළිකරන්නට සිදුවනු ඇතැයි මන්ත්‍රීවරයා සඳහන් කළේය.  

අඩුපාඩුවක් පෙන්වා දුන්නාම විනය පරීක්‍ෂණ කරන්නේ නම් එය පරිණත නැති ලේකම්වරයාගේ වරදක් බවත්, පක්‍ෂයක විනය තිබිය යුත්තේ ඇමතිවරුන්ගේ දූෂණ වහන්නට නොවන බවත් කී ජගත් කුමාර මහතා තමා උත්සාහ කරන්නේ විවිධ හේතු නිසා ජනතාවට එපා වී ඇති ආණ්ඩුව රැකගැනීමට බව ද පැවසීය.

තමා විනය පරීක්‍ෂණවලට බයේ වැඩ කරන්නේ නැතැයි කී මන්ත්‍රීවරයා රාජ්‍ය අමාත්‍ය ලොහාන් රත්වත්ත මහතා සම්බන්ධ සිද්ධිය සහ තමා සම්බන්ධ සිදුවීම් හාත්පසින් වෙනස් ඒවා බව ද ප්‍රකාශ කළේය.

හොරකම්, ජඩකම්, වැරදි කරන අය ගැන කතා කරන මන්ත්‍රීවරුන්ගේ කටවල් පක්‍ෂයේ විනය ඉදිරියට දමා වැසිය නොහැකි බව ද මන්ත්‍රීවරයා කීවේය.