(රොමේෂ් මධුෂංඛ)

මුලතිව් මල්ලාවි පොලිස් වසමේ වව්නිකුලම් වැවට කැබ් රථයක් පෙරලීමෙන් අතුරුදහන් වූ තිදෙනාගේ මළ සිරුරු අද (20) අලුයම වන විට සොයා ගත් බවට මල්ලාවි පොලීසිය පවසයි.
 
වර්ෂාව හේතුවෙන් පිරී ඇති වව්නිකුලම් වැව බැලීම සඳහා ඊයේ (19) සවස පියා, දියණිය සමග යාබද නිවසක සිටි තවත් ළමුන් දෙදෙනෙකු එක්ව කැබ් රථයක ගමන් කරමින් සිටියදී කැබ් රථය වැවට පෙරලී යාමෙන් මෙම අනතුර සිදුව තිබුණි.
 
කැබ් රථයේ සිට වැවේ සිරි නරඹමින් ගමන් කරන අවස්ථාවේදී වැව් බැම්මේ තිබූ වතුර වලක් බේරීමට කැබ් රථයේ රියදුරු වූ පියා ගත් උත්සහය හේතුවෙන්, වැසි සහිත කාලගුණය හා වැව් බැම්මේ ලිස්සන සුලු ස්වභාවය හේතුවෙන් කැබ් රථය පෙරලී ගොස් ඇති බවට පරීක්ෂණ සිදු කල මල්ලාවි පොලීසිය විසින් අනාවරණය කර ගෙන ඇත.
 
එහිදී කැබ් රථය පෙරලීමෙන් කැබ් රථයේ සිටි පියා, දියණිය හා තවත් පිරිමි දරුවෙකු අතුරුදහන් වූ අතර එක් 13 හැවිරිදි දරුවෙකුගේ දිවි බේරා ගැනීමට යුද හමුදාව හා ප්‍රදේශවාසීහු සමත්වූහ.
 
පසුව යුදහමුදාව හා ප්‍රදේශවාසීන් එක්ව අතුරුදහන් වූවන් සෙවීම රාත්‍රිය පුරාම සිදු කල අතර අද අලුයම වන විට අතුරුදහන් වූ තිදෙනාම ජලයේ ගිලීමෙන් මිය ගොස් සිටියදී මළ සිරුරු සොයා ගත් බවට මල්ලාවි පොලීසිය පැවසීය.
 
අනතුරින් මිය ගොස් ඇත්තේ මුලතිව් මල්ලාවි පොලිස් වසමේ සෙල්වපුරම් ප්‍රදේශයේ පදිංචි 38 හැවිරිදි පියා සහ ඔහුගේ අවුරුදු 3 ක් වයසැති දියණිය සමග යාබද නිවසේ සිටි 13 හැවිරිදි පිරිමි දරුවාය.

අනතුරින් දිවි බොරාගත් 13 හැවිරිදි දරුවා මල්ලාවි ප්‍රාදේශීය රෝහලේ ප්‍රතිකාර ලබන අතර මිය අයගේ පශ්චාත මරණ පරීක්ෂණ කටයුතු මල්ලාවි රෝහලේදී සිදු කිරීමට පියවර ගෙන ඇති බවට පරික්ෂණ සිදු කරන මල්ලාවි පොලීසිය වැඩිදුරටත් පැවසීය.