(පුෂ්පකුමාර මල්ලවආරච්චි)

මීරිගම  ලියාපදිංචි  නොකළ ආගමික මධ්‍යස්ථානයක් පවත්වාගෙන යන පුද්ගලයකු පිළිබඳව රජය වහා පියවර ගන්නා ලෙස ඉල්ලමින් භික්ෂූන් වහන්සේ නමක් අද(7 ) මීරිගම බස්නැවතුම්පළ අසළ උපවාසයක් ආරම්භ කළහ.

මෙසේ උපවාසයක යෙදෙන්නේ බිබිල යල්වෙල ආරණ්‍යවාසී අනුරාධපුර අමථධම්ම හිමියෝය.

පුද්ගලයකු  නම් දෙකකින් පෙනී සිටීම මෙන්ම නිසියාකාරව  ලියාපදිංචි නොකර ආගමික මධ්‍යස්ථානයක්  පවත්වාගෙන යාම වරදක් බැවින්  මේ ගැන රජයේ අවධානය යොමුකර නීත්‍යානුකූල  පියවර ගන්නාතුරු උපවාසයේ යෙදෙන බව උන්වහන්සේ සඳහන් කළහ.

පුද්ගලයන් වැරැදි  තොරතුරු  සමාජ ගත කිරීමෙන්  බුදු දහම විනාශවෙන අතර දරු පරපුර වැරදි  මාර්ගයේ  යාමට ඉඩ ඇති බැවින්  රජය වහා පියවර ගත යුතු බව ද උන්වහන්සේ සඳහන් කළහ.

මේ අවස්ථාවට වැඩම කළ කැලණිය විශ්ව විද්‍යාලයේ මහාචාර්ය ඉඳුරාගාරේ ධම්මරතන හිමියෝ මෙම සිදුවීම ඉතාමත්  භයානක තත්ත්වයක් බව ප්‍රකාශ කළ අතර නිසි පියවර ගන්නා ලෙස ජනාධිපතිවරයා හා අගමැතිවරයා දැනුවත් කිරීමට ඒ අවස්ථාවේදීම  පියවර ගත්හ.

ඕමල්පේ සෝභිත හිමි, දක්ෂිණ ලංකාවේ ප්‍රධාන සංඝනායක හිමියන් ඇතුලු ප්‍රදේශයේ  මහා සංඝරත්නය ද මේ අවස්ථාවට එක්ව සිටියහ.