(විනීතා එම් ගමගේ)

සමෘද්ධි අධ්‍යක්ෂ ජනරාල්වරයා මැතිවරණ කොමිසන් සභාවේ නියෝග නොතකා දිගින් දිගටම සමෘද්ධි පත්වීම් ලබාදෙන බව මැතිවරණ ප‍්‍රචණ්ඩ ක‍්‍රියා නිරික්ෂණ මධ්‍යස්ථානය චෝදනා කරයි.

බදුල්ල හා මොණරාගල දිස්ත‍්‍රික්කවල සමෘද්ධි පත්වීම් විශාල ගණනක් දී ඇතැයි වාර්තා වී ඇති බවත් එයින් පත්වීම් පහක් මැතිවරණය ප‍්‍රකාශයට පත් කිරීමෙන් පසු ලබා දී ඇති බව තහවුරු කර ගත් බවත් මැතිවරණ ප‍්‍රචණ්ඩ ක‍්‍රියා නිරික්ෂණ මධ්‍යස්ථානයේ ජාතික සම්බන්ධීකාරක මංජුල ගජනායක මහතා ලංකාදීපයට පැවැසීය.

සමෘද්ධි අධ්‍යක්ෂ ජනරාල්වරයා මෙම කාලසීමාවේ දී ඔහුගේ ඥාති දියණියකට ද පත්වීමක් ලබා දී ඇති බවත් ඇය ඔක්තෝබර් 04 වැනිදා සේවය ආරම්භ කර ඇති බවත් හෙතෙම කියා සිටියේය.

මේ වනවිට ඌව පලාත පමණක් නිරික්ෂණය කළ බවත් දිවයින පුරා සමෘද්ධි පත්වීම් දී ඇතැයි වාර්තා වන බවත් කී ගජනායක මහතා ඒවා ද තහවුරු කර ගනිමින් සිටින බව ද සඳහන් කළේය.

සමෘද්ධි අධ්‍යක්ෂ ජනරාල්වරයා සහ බදුල්ල දිස්ති‍්‍රක් සමෘද්ධි අධ්‍යක්ෂවරයාට එරෙහිව බදුල්ල දිස්ත‍්‍රික් මැතිවරණ කොමසාරිස්වරයාට සහ මැතිවරණ කොමිසමේ සභාපතිවරයාට පැමිණිලි කළ බව ද හෙතෙම කියා සිටියේය.