(ඉන්දිකා රාමනායක)

මඩකලපුව දිස්ත්‍රිකයේ පාර්ලිමේන්තු මන්ත්‍රී වියාලේන්ද්‍රන් මහතා ඇතුළු පස්දෙනකුට මෙම 30 වැනිදා මඩකලපුව මහේස්ත‍්‍රාත් අධිකරණයේ පෙනී සිටින ලෙසට මඩකලපුව මහේස්ත්‍රාත්වරයා අද (28) නොතිසි නිකුත් කළ බව පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර මහතා පැවසීය.

පාස්කු ඉරුදින මඩකලපුව සියෝන් දේවස්ථානයට මරාගෙන මැරෙන බෝම්බ ප‍්‍රහාරය එල්ල කළ මොහොමඩ් නසාර් මොහොමඩ් ආසාද් නැමැත්තාගේ ශරීර කොටස්  මඩකලපුව කල්ලියන්කාඩු  සුසානභූමියේ  භූමදානය කිරීමට විරුද්ධව පාර්ලිමේන්තු මන්ත්‍රී වියාලේන්ද්‍රන් මහතා ඇතුළු පිරිසක් ඊයේ (27) උද්ඝෝෂණයක නිරතවූහ.

මඩකලපුව මහේස්ත්‍රාත්වරයා දිස්ත්‍රික් ලේකම්වරයා වෙත නිකුත් කළ නියෝගයකට අනුව මෙම ත්‍රස්තවාදීයාගේ  සිරුරු කොටස්   ඉකුත් 26 වැනිදා  කල්ලියන්කාඩු සුසාන භූමියේ  මිහිදන් කළ බවත් එයට උරණ වු  ප්‍රදේශවාසීන් පිරිසකට ඊයේ  (27) රාත්‍රීයේ කදුලු ගෑස් ප‍්‍රහාර එල්ල කර ඔවුන් විසුරුවා හැරීමට පොලිසිය කටයුතු කළේය.

පොලිසිය ඊයේ මෙම සිද්ධිය සම්බන්ධයෙන් අධිකරණයට කරුණු වාර්තා කර තිබූ බවත් එහිදී  මෙම උද්ඝෝෂණයට පාර්ලිමේන්තු මන්ත්‍රී  වියාලේන්ද්‍රන් මහතා ඇතුළු ඔහුගේ හිතවතුන් සිව් දෙනකු සිටි බවට අධිකරණයට කරුණ වාර්තා කර තිබිණි.

එම කරුණු සැළකිල්ලට ගත් මහේස්ත‍්‍රාත්වරයා  පාර්ලිමේන්තු මන්ත්‍රීවරයා ඇතුළු පස් දෙනාට නොතිසි නිකුත් කළේය.