(නිමල කොඩිතුවක්කු)
 
මෙවර අයවැය යෝජනාවෙන් වැරදි දත්ත ඉදිරිපත් කර ඇති බව පවසමින් මුදල් අමාත්‍ය මංගල සමරවීර මහතාට එරෙහිව විශ්වාසභංග යෝජනාවක් ඉදිරිපත් කරන බව  පාර්ලිමේන්තු මන්ත‍්‍රී ආචාර්ය බන්ධුල ගුණවර්ධන මහතා කොළඹදී පැවසීය.

විශ්වාසභංග යෝජනාවේ කටයුතු මෙවර සිංහල හින්දු අලූත් අවුරුද්දේ වැඩ ඇල්ලීමේ නැකතින් ආරම්භ කරන බවද ගුණවර්ධන මහතා කියා සිටියේය.

පුංචි බොරැල්ලේ පිහිටි පාර්ලිමේන්තු මන්ත‍්‍රී තිලංග සුමතිපාල මහතාගේ  නිවසේ පැවැති මාධ්‍ය හමුවකට එක්වෙමින් මන්ත‍්‍රීවරයා මේ බව පැවසීය.

එහිදී වැඩිදුරටත් අදහස් දැක්වූ පාර්ලිමේන්තු මන්ත‍්‍රී ආචාර්ය බන්ධුල ගුණවර්ධන මහතා මෙසේද කීවේය.

  ‘‘මෙවර  සම්මත වූ අයවැය ලේඛනය පිළිබඳ රටේ  නිමැවුම, ආදායම,  සේවා නියුක්තිය, ගෙවුම් ශේෂය,  ඉතුරුම්, ආයෝජන ආදී කරුනු පිළිබඳ මහා බැංකුවෙන් වාර්තාවක් පාල්ලිමේන්තුවට ඉදිරිපත් කරන ලෙසට දැනුම් දීලා තියෙනවා.  එතකොට  මේ පාර්ලිමේන්තු මන්ත‍්‍රීවරු ඔක්කොම විවාද කරලා තියෙන්නේ වැරදි වාර්තාවකටයි.

රට ආර්ථික වශයෙන් අන්ත අගාදයකට ගෙනල්ලා ආර්ථිකය කඩා වට්ටලා  ව්‍යාජ අයවැය ලේඛනයක් ඉදිරිපත්  කිරීම සම්බන්ධයෙන් විපක්ෂයේ ආර්ථික පර්යේෂණ ඒකකය විදියට අපි මංගල සමරවීර මහතාට එරෙහිව විශ්වාසභංග යෝජනාවක් ඉදිරිපත් කරනවා. මේ සම්බන්ධයෙන් වන යෝජනාව මම පක්ෂ නායකයන්ටත්  ඉදිරිපත් කරනවා. අලුත් අවුරුද්දේ වැඩ ඇල්ලීමේ නැකතට මම මේ විශ්වාසභංග යෝජනාව ලියන්න පටන් ගන්නවා. 

ආණ්ඩුක‍්‍රම ව්‍යවස්ථාවේ 148 වන වගන්තිය අනුව මුදල් පිළිබඳ සම්පූර්ණ බලය තියෙන්නේ  පාර්ලිමේන්තුවටයි. මුදල් අමාත්‍යවරයා තමන්ගේ වගකීම නිසි ලෙස ඉෂ්ට කරලා නැත්නම්  මුදල් ඇමැතිවරයෙක් පාර්ලිමේන්තුව නොමග යවලා තියෙනවා නම් ඔහුව තවදුරටත් විශ්වාස  කළ නොහැකියි. ඒ  නිසා ආංශික අධීක්ෂණ කාරක  සභා වාර්තාව පදනම් කරගෙන මංගල සමරවීර මහතාට එරෙහිව විශ්වාසභංග  යෝජනාවක් ඉදිරිපත් කිරීමට අපි කටයුතු කරනවා’’ යැයි ද පාර්ලිමේන්තු මන්ත‍්‍රී ආචාර්ය බන්ධුල ගුණවර්ධන මහතා වැඩිදුරටත් පැවැසීය.