මෙක්සිකෝවේ උතුරු දිග චිහුවාහුවා ප්‍රාන්තයේ මත්ද්‍රව්‍ය ජාවාරම්කරුවන් දෙපිරිසක් අතර ඇති වූ වෙඩි හුවමාරුවකින් පුද්ගලයින් 19 දෙනෙකු ජීවිතක්ෂයට පත්ව ඇති බව ප්‍රාන්ත රජය පවසයි.
 
“ඔවුන් ඇමරිකාවට මත්ද්‍රව්‍ය ගෙනයන අපරාධ කණ්ඩායම් දෙකක්” යැයි චිහුවාහුවා හි නීතිපති සීසර් පෙනිච් රොයිටර් පුවත් සේවයට පැවසීය. 
 
මැඩෙරා මහ නගර සභාව ආසන්නයේ  වෙඩි හුවමාරුව සිදු වූ ස්ථානයේ තිබී ආරක්ෂක අංශ විසින් මළ සිරුරු 18 ක් සොයා ගන්නා ලදී. 
 
තුවාල ලැබූ පුද්ගලයෙකු පසුව එම ස්ථානයේදීම  මිය ගිය බව රජයේ නීතිපති කාර්යාලය නිවේදනයක් නිකුත් කරමින් කියා සිටී.
 
ඔවුන් සතුව ගිනි අවි 18 ක්, වාහන දෙකක් සහ අත්බෝම්බ දෙකක් ද තිබී ඇති අතර ආයුධ සන්නද්ධ පුද්ගලයින් සෙවීමේ පරීක්ෂණ අඛණ්ඩව සිදුවන බව එම ප්‍රකාශයේ සඳහන් වේ.
 
තුවක්කුකරුවන් ජුවාරෙස් හා ප්‍රතිවාදී සීනාලෝවා සමඟ සම්බන්ධ වූ කණ්ඩායම්වලට අයත් බව ප්‍රාදේශීය මාධ්‍ය වාර්තා කළේය.
 
මෙක්සිකානු ජනාධිපති ඇන්ඩ්‍රෙස් මැනුවෙල් ලෝපෙස් ඕබ්‍රඩෝර් කියා සිටියේ රට තුළ කොරෝනා වසන්ගතය පැතිරී තිබියදීත් අපරාධ කණ්ඩායම් අතර ප්‍රචණ්ඩත්වය අඛණ්ඩව පැවතීම අවාසනාවක් බවයි.
 
“මාර්තු අග දී කොරෝනා වයිරසය වඩාත් පුළුල්ව පැතිරෙන්නට පටන් ගත් විට, ප්‍රචණ්ඩත්වයේ සැලකිය යුතු අඩුවීමක් පෙනෙන්නට තිබුණි, අවාසනාවකට එය එසේ නොවීය.” ලෝපෙස් ඔබ්‍රඩෝර් පැවසීය.

පසුගිය වසරේදී, ඇමරිකානු-මෙක්සිකානු මෝමන් ජන කණ්ඩායමට අයත් කාන්තාවන් තිදෙනෙකු සහ ළමුන් හය දෙනෙකු මත්ද්‍රව්‍ය ජාවාරම්කරුවන් විසින්  වෙඩි තබා ඝාතනය කළේය.
 
මෙක්සිකෝවේ මේ වනවිට කොරෝනා වයිරස රෝගීන් 1 890ක් වාර්තා වන අතර මරණ 79ක් සිදුවී තිබේ.
 
633 දෙනකු සුවය ලබා රෝහල් වලින් පිටව ගොස් තිබේ.
 
(රොයිටර් පුවත් ඇසුරිණි - 085)