(සුජිත් හේවාජුලිගේ)

මත්පැන් අලෙවිසල් හතරක මුද්‍රා ගලවා ඇතැයි ලැබුණු පැමිණිලි සම්බන්ධයෙන් විමර්ශන අරඹා ඇතැයි සුරාබදු කොමසාරිස් (නීති) කපිල කුමාරසිංහ මහතා පවසයි.

මෙම මත්පැන් අලෙවිසල් දකුණු පළාතේ සහ බස්නාහිර පළාතේ පවත්වාගෙන යන ඒවාය.

මේ පරීක්ෂණවලදී එම බලපත්‍රලාභීන් වරදක් කර ඇතැයි තහවුරු වුවහොත් ඔවුන්ට එරෙහිව කාර්මික අපරාධ චෝදනා යටතේ ක්‍රියාමාර්ග ගන්නා බව සුරාබදු කොමසාරිස්වරයා සඳහන් කරයි.

කොවිඩ් 19 පැතිරීම පාලනය කිරීම සඳහා රටපුරා සංචරණ සීමා ක්‍රියාත්මක කිරීමත් සමග මත්පැන් අලෙවිසල් ඉකුත් මැයි මස 13 වැනිදා සිට වසා දැමිණ. වසා දැමුණු එම මත්පැන් අලෙවිසල් සියල්ල විවිධ පැමිණිලි හේතුවෙන් මුද්‍රා තැබීමට සුරාබදු ප්‍රධානීහු පසුව කටයුතු කළහ.

විවිධ පාර්ශ්වවලින් එල්ල කෙරෙන බලපෑම් හේතුවෙන් තම මත්පැන් අලෙවිසල්වලට මුද්‍රා තබන්නැයි ඇතැම් මත්පැන් අලෙවිසල් හිමිකරුවන්ද දෙපාර්තමේන්තුවෙන් ඉල්ලීම් කර තිබූ බවත් මුද්‍රා තැබීමේ තීරණය ගැනීමට එම ඉල්ලීම්ද සැළකිල්ලට ගත් බවත් සුරාබදු දෙපාර්තමේන්තුව පවසයි.