(සුජිත් හේවාජුලිගේ )

ඌව පළාත් කෘෂිකර්ම දෙපාර්තමේන්තුව විසින් පාලනය කරනු ලබන  බණ්ඩාරවෙල බිඳුණුවැව පටක රෝපණ මධ්‍යස්ථානය සහ බිම්මල් බීජ නිෂ්පාදන ඒකකය ජනාධිපති ගෝඨාභය රාජපක්ෂ මහතා ඉකුත් 18 වැනිදා  නිරීක්ෂණය කළේය.

මෙම ගොවිපොළ කාබනික පොහොර භාවිතා කර පවත්වාගෙන යනු ලබන්නකි.

කාබනික පොහොර නිෂ්පාදනය ඇතුළු සේවවාන් වඩාත් පුළුල් කරන ලෙස ජනාධිපතිවරයා එහිදී එම මධ්‍යස්ථානයේ නිලධාරින්ට උපදෙස් දුන්නේය.

කෙසෙල්, අඹ ඇතුළු පළතුරු සහ මල් පැළ වර්ගවලට අදාළ පටක රෝපණයද  මෙම මධ්‍යස්ථානය විසින් සිදු කෙරේ.

මීට අමතරව  විශ්වවිද්‍යාලවල  කෘෂි පීඨ සහ පාසල් සිසුන්ගේ අධ්‍යාපනික පර්යේෂණ කටයුතු සඳහා අවශ්‍ය පහසුකම් සැපයීමද මෙම මධ්‍යස්ථානය  මගින් සිදු කෙරෙන බව ජනාධිපති කාර්යාලය පවසයි.

තවද කෘෂිකර්ම පර්යේෂණ නිලධාරීන් පුහුණු කිරීම සහ පළාතේ ගොවීන්ට අවශ්‍ය තාක්ෂණික සහ ප්‍රායෝගික දැනුම ලබාදීම සඳහා ආදර්ශ ගොවි පොළක්ද එම ස්ථානයේ පවත්වාගෙන යනු ලැබේ.

මේ අවස්ථාවට   බදුල්ල දිස්ත්‍රික් පාර්ලිමේන්තු මන්ත්‍රී සුදර්ශන දෙනපිටිය සහ යුද හමුදාපති ජෙනරාල් ශවේන්ද්‍ර සිල්වා යන මහත්වරුන්  ඇතුළු  පිරිසක්ද සහභාගි වූහ.