( ඉන්දිකා රාමනායක සහ ජයන්ත සමරකෝන්)

අනුරාධපුර බන්ධනාගාරයේ වෙඩි තැබීමෙන්  තුවාල ලැබූ රැඳවියන් 6 දෙනා  අනුරාධපුර රෝහලේ ප්‍රතිකාර ලබන බවත් , මිය ගිය රැඳවියන් දෙදෙනාගේ සිරුරු රෝහලේ  මෘතශරීරාගාරයේ තැන්පත් කර ඇති බවත්    පොලිස් මාධ්‍ය ප්‍රකාශක පොලිස්  අධිකාරී ජාලිය සේනාරත්න මහතා පැවසීය.

මේ වන විට බන්ධනාගාරය තුළ සහ ඒ අවට තත්ත්වය පාලනය කර ආරක්ෂාව තර කර ඇතැයිද පොලිස් මාධ්‍ය  ප්‍රකාශකවරයා කීවේය.

ඊයේ රාත්‍රී ගැටුම අවස්ථවේදී  බන්ධනාගාර නිලධාරී විවේකාගාරය ගිනි තබා ඇති බවත් රැඳවියන් එහි වෛද්‍ය මධ්‍යස්ථානය කඩා බෙහෙත් ද්‍රව්‍ය සොයා ඇති බවත් ඇති බවත් බන්ධනාගාර  ආරංචි මාර්ග කියයි.එමෙන්ම ආයුධ ගබඩාවේ තිබු මංචු කුට්ටම් කිහිපයක්ද පැහැරගෙන ඇතැයි අනාවරණය වී තිබේ. 

එමෙන්ම ප්‍රධාන ජේලර්වරයාගේ නිල කාමරයද කඩා එහි මුදල් සේප්පුවකින් මුදල් ගැනීමට ඔවුන් තැත් කළඳ එය සාර්ථක වී නැතැයිද  තොරතුරු අනාවරණය වී ඇත.

සිද්ධිය වූ අවස්ථාවේදී සේවයේ නියැලී ඇත්තේ බන්ධනාගාර නිලධාරීන් 25 ක පමණ ප්‍රමාණයක් වන බවත්  රැඳවියන් 1054 ක වැනි ප්‍රමාණයක් ඇති කළ කලබලය හේතුවෙන් මෙම වෙඩි තැබීම සිදුව ඇතැයි ද පැවසේ.

කෙසේ වෙතත් සිදු වූ වෙඩි තැබීම පිළිබඳ විෂේෂ පරීක්ෂණයක් කිරීමට නියමිත බව බන්ධනාගාර කොමසාරිස්  බන්දුල ජයසිංහ මහතා පැවසීය.

 ඊයේ ( 21) බන්ධනාගාරය තුළ සිදුවු  වෙඩි තැබීමෙන් රැඳවියන්  දෙදෙනකු මිය ගිය අතර තවත් 6 දෙනකු තුවාල ලැබූහ.