(විනීතා එම්. ගමගේ)
 
වාරියපොළ, බණ්ඩාර කොස්වත්ත ප්‍රදේශයේදී වෙළඳසැළකට පහරදුන්නැයි කියන සිද්ධිය, මැතිවරණයට අදාළ නොවන පෞද්ගලික ආරවුලක් යැයි මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය කියයි.
 
මැතිවරණ ප්‍රචණ්ඩ ක්‍රියාවක් ලෙස මෙම සිද්ධිය වාර්තා වූ බවත් මේ පිළිබඳව නිරීක්ෂණය කිරීමේ දී එය පෞද්ගලික ආරවුලක් බව හෙළි වූ බවත් මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානයේ ජාතික සම්බන්ධීකාරක මංජුල ගජනායක මහතා ලංකාදීපයට පැවැසීය.
 
සිද්ධිය පිළිබඳව වෙළඳසැල් හිමියාගෙන් ද ප්‍රකාශයක් ලබා ගත් බවත් එයින් ද තහවුරු වූයේ සිද්ධිය මැතිරණයට සම්බන්ධ නොවන බව යැයි කී ගජනායක මහතා ජනාධිපතිවරණයේ සාමකාමී බවට එම සිද්ධියෙන් හානියක් නොවූ බව වගකීමෙන් කිව හැකි බවත් කියා සිටියේය.
 
කෙසේ වෙතත් මැතිවරණය සාමකාමී හා නිදහස් මැතිවරණයක් බව තම මතය යැයි ද එය අනෙක් නිරීක්ෂණ සංවිධානද එම මතය තහවුරු කරන්නේ යැයි ද හෙතෙම තවදුරටත් සඳහන් කළේය.