බංගලාදේශයේ ඡලෝකාටි දිස්ත්‍රික්කයේ සුගන්ධා නදියේ යාත්‍රා කරමින්  කුඩා මගී නෞකාවක ඇති වූ ගින්නකින් 39 දෙනකු මියගොස් 72 දෙනකු පිළිස්සුම් තුවාල ලබා ඇතැයි බංගලා දේශ මාධ්‍ය වාර්තා කරයි.

නත්තල් නිවාඩුවට නිවෙස් බලා යමින් සිටි මගීන් 800 රැගෙන  එම්.වී අවිජාන්-10 ෆේරි නෞකාවේ පෙරවරු 3.00 ට පමණ මෙම ගින්නක් හටගෙන ඇත.

ගින්න පැතිරෙනවාත් සමග පිරිසක් ගඟට පැණ ඉවුරට පීනා ඇත.

ගින්නට අසු වූවන් මුදවා ගැනීමේ මෙහෙයුමට නායකත්වය දුන් ගිනි නිවන හමුදාවේ නිලධාරී කමල් උද්දින් මහතා පැවසුවේ ගින්න නෞකාවේ එන්ජින් කාමරයේ හටගන්නට ඇතැයි තමන් විශ්වාස කරන බවයි .

ඔහු තවදුරටත් කියා සිටියේ ගිනි නිවන රථ {බෝට්ටු} 15 කට හටගත් ගින්න නිවා දැමීමට පැය දෙකක කාලයක් ගත වූ බවයි .ගින්න නිවා දැමීමෙන් අනතුරුව නැව ගං ඉවුරට රැගෙන ඇවිත් ඇති අතර ගිනිගත් නැව සිසිල් කර ඇතුළට යා හැකි තත්වයට පත් කිරීමට තවත් පැය 8ක කාලයක් ගත වී ඇත .

ගඟට පැන්නවුන් ගිලි ඇද්දැයි දැන ගැනීම කිමිදුම්කරුවන් ගං පතුලට කිමිදෙන්නට විය . බලධාරීන් පවසා සිටියේ මරණ ප්‍රමාණය ඉහල යා හැකි බවයි .