පාසල් යළි ඇරඹෙයි

දුවේ පුතේ, ඔය ගොල්ලෝ ලොකු නිවාඩුවකින් පස්සේ අද පාසල් යනවා.. සතුටුයි නේද..? යහළුවන්.. ගුරුවරු.. ඔක්කොම ආයෙත් හමුවෙනවා. හැබැයි මේ පාර ටිකක් ප්‍රවේශම් වෙන්න. ලෙඩරෝග වලින්. විශේෂයෙන්ම කොරෝනා වයිරසයෙන්. ඔබ පැය භාගයකටවත් වරක් හැකිනම් අත් සෝදන්න. මුහුණුනම් අල්ලන්නම එපා. මාස්ක් එක දමාගෙන ඉන්න. හැකිනම් තවත් අලුත් මාස්ක් දෙක තුනක් ඔබේ බෑගයේ රැගෙන යන්න. පාවිච්චි කළ මාස්ක් හැමතැනම විසි කරන්න එපා. අපද්‍රව්‍ය දැමීම සඳහා නියමිත"කුණු භාජනයට" ඒවා දමන්න. වෙනදා වගේ නොවෙයි.. මේ පාර " කඩ චෝරු" කෑමෙන් ටිකක් වළකින්න. මේ අද විද්‍යාඥයින් සොයාගත්තා වායුගෝලයේ කුඩාම අංශු මතත් කොරෝනා වයිරසය පවතිනවා කියලා. නිරාවරණය කළ, ආහාර විකුණන තැන්වලින් "අරවා, මේවා.." කන එක නවත්වන්න අමාරු තමයි. එ්ත් ඉතින් මොනවා කරන්නද.? අනවශ්‍ය ලෙස වැස්සට තෙමෙන්න එපා. විශේෂයෙන් අලුත් වැස්සට... පාසැල් බස් එකේදීත් හැකි උපරිමයෙන් ප්‍රවේශම් වෙන්න. තව එකක් එ්ත් මේ කොරෝනා ගැන නොවෙයි.. ඔබ බසයෙන් බැස්ස පසු .. බසයේ " පිටුපසින්" ගොස් පාර මාරුවෙන්න. ඉතින් දරුවනි, හොඳට ඉගෙනගෙන රටට වැඩදායි, නීති ගරුක, විනීත, අවංක රටවැසියෙක් වෙන්න. ඔබට " සුව දායක" පාසැල් වාරයක් මම පතනවා.

රටේ ජීවනාලිය බඳු මේ සුන්දර ළමා පරපුර කිරිකොකුන් සේ දුටුවිට සිතට ඇති වන්නේ පුදුමාකාර සතුටක්... මේ සුන්දර පාසල් විය අප ගෙවූ ආකාරයට වඩා මේ දරුවන්ට හිස මත පැටවී ඇත්තේ මොනතරම් වගකීම් සම්භාරයක්ද? කොරෝනා කළ මේ හදිය සුළුපටු කරදරයක් නොවේ. මීටරේ දුර මුහුණුවැස්ම ආදියත්, වෙනදා එකට කෙළිදෙලෙන් එකිනෙකා ආසන්නයේ සිටි ජීවිතය අද දුරස් වී ඇත.. අනේ ! දරුවනේ, ඒත් මේ වසංගත වෛරසය මේ රටින් තුරන් වෙනතුරු ඔයාලට මෙසේ ඉන්න සිදුවෙනවා. මෙය මහ කරදරයක් වුණත්, නිරෝධායන නීතිරීති හරිහැටි පිළිපදින්න. ඔබගේ විනය හා නීතිරීති පිළිපැදීම තුළ ඔබේ ආරක්ෂාවත් රටේ ආරක්ෂාවක් පවතියි. එ් නිසා බුද්ධිමත් දරුවනේ, මේ මොන බාධක ආවත් අධ්‍යාපන කටයුතු ඉහළින්ම කරගෙන මේ රට ලොව බුද්ධිමත් පැත්තෙන් ඉහළටම ගෙනයෑමේ වගකීම ඔබ සියලු දෙනා සතුයි. ලෝකය රටකට සලකනුයේ එහි සිටින අන්තවාදී අනුවණයන් නිසා නොවේ. බුද්ධිමතුන් වෙනුවෙනි.., එබැවින්, ඔබ බුද්ධිය මුවහත් කරගෙන මේ රටත්, ලෝකයත් බබලවන්න කටයුතු කරන්න දරුවනේ... ඔබසැමට ජයෙන් ජය...!!!

අපි පාසැල් ගිය ඒ සොඳුරු මතකය අලුත් වී, දෑසට කඳුලක් නැඟුනි. මොනවා කරන්නද ප්‍රිය දරුවනේ..? කාලය මැවූ වෙනසක අරුමය... ජීවිතේ හැම දෙයක්ම අපට කැමති විදිහට වෙන්නේ නැහැ... අපේ කාලයට වඩා ඔයාලගේ වර්තමානය අභියෝග වලින් ගහණයි. මට හොඳටම විශ්වාසයි ඔබලා උට්ඨාන වීර්යයෙන් යුක්තව ඒ අභියෝගය ජය ගන්නා බව.. අපි පාසැල් යන කාලයේ "ගුරු දෙවිවරුන්" අපට කියා දුන් වැකියකින් මම මේ සටහනින් නවතින්නම්.. "උගත මනා ශිල්පයමයි මතු රැකෙනා.."