(විනීතා එම්  ගමගේ)


වර්තමාන අර්බුදය,  මූලය පවතින්නේ 1978 දෙමුහුන් ආණ්ඩුක‍්‍රම  ව්‍යවස්ථාව තුළ යැයි ශ්‍රී ලංකා නීති විද්‍යාලයේ හිටපු විදුහල්පති, මව්බිම වෙනුවෙන් වෘත්තියවේදියෝ සංවිධානයේ සභාපති ආචාර්ය ඩබ්ලිව් ඞී රොද්‍රිගෝ මහතා ප‍්‍රකාශ කළේය. 

රාජ්‍ය නායකයා හා ආණ්ඩුවේ ප‍්‍රධානියා පක්ෂ දෙකකින් පත්වූ සැම අවස්ථාවකම රටේ අර්බුද හටගත්තේ යැයි ද රොද්‍රගෝ මහතා කියා සිටියේය. 

මෙවර තත්ත්වය තවත් දරුණු වූයේ යැයි කී ඒ මහතා ජනාධිපතිවරයා විසින් පාර්ලිමේන්තුව විසුරුවා හැරීම බල රහිත කරන ලෙස ඉල්ලා ශ්‍රේෂ්ඨාධිකරණයේ නඩු 13 ක් පවරා ඇතැයි ද කීය. කෙසේ වෙතත් මෙසේ මෙම තීන්දුවට එරෙහිව අධිකරණයට යාම වරදක් නොවන බවත් එයින් නීති යේ ආධිපත්‍යය සුරැකෙන බවත් ඔහු ප‍්‍රකාශ කළේය. 

මේ අතර පාර්ලිමේන්තුවට එහි ස්ථාවර නියෝග අනුව ක‍්‍රියාත්මක විය හැකි යැයි ද ස්ථාවර නියෝග අත් හිටුවා කි‍්‍රයාකිරීමටත් පාර්ලිමේන්තුවට බලය ඇතැයි ද කී රොද්‍රිගෝ මහතා පවතින ප‍්‍රශ්නය ජාතික වශයෙන් වැදගත් එකක් බැවින් අවසානයේ පාර්ලිමේන්තුවට ජනතාව ඉදිරියට ගොස් ජනමතය  විමසීමට ද හැකියාව ඇතැයි කියා සිටියේය. 

ඉකුත් 11 හා 12 දෙදින තුළ එම නඩු විභාගයට ගනු ලැබුයේ  126 වන ව්‍යවස්ථාව යටතේ යැයි ද පැවසීය.

ශ්‍රේෂ්ඨාධිකරණය විසින් ඊයේ සිදුකරනු ලැබුයේ පළමුව නඩුව පවත්වාගෙන යාමට අවසර ගත යුතු බැවින් එසේ අවසර ගැනීම යැයි කී රොද්‍රිගු මහතා එය නඩුවේතීන්දුව ලෙස සමහරු අර්ථ දක්වන නමුත් ඒ නඩුවේ තීන්දුව නොවන බවත් නඩුවට හේතුවූ ගැසට් නිවේදනය අත්හිටවනු ලැබුයේ ශ්‍රේෂ්ඨාධිකරණය විසින් ව්‍යවස්ථාව අර්ථ නිරූපණය කරගන්නා තුරු බවත් පෙන්වා දුන්නේය. 

වර්තමාන ආණ්ඩුක‍්‍රම ව්‍යවස්ථාවට ඇමරිකා, ප‍්‍රංශ හා බ‍්‍රිතාන්‍ය ව්‍යවස්ථාවන්ගෙන් එක් කරගත් කොටස් ඇතැයි ද එසේ වුවත් ශ්‍රී ලංකා ජනාධිපතිවරයාට ඇමරිකානු ව්‍යවස්ථාවෙන් එරට ජනාධිපතිවරයාට දෙන බලතල වලට වඩා වැඩි බලයක් හිමිවී ඇතැයි ද හෙතෙම පෙන්වා දුන්නේය.

ජනාධිපතිවරයා  ගත් පියවරකට එරෙහිව ශ්‍රේෂ්ඨාධිකරණයට යා හැකි බව පෙන්වා දුන් රොද්‍රගු මහතා එකී පියවරයන් හේතුවෙන් අයිතිවාසිකම් උල්ලංඝණය වේ යැයි හෝ උල්ලංඝණය වන්නේ යැයි සැක කරන අවස්ථාවක මාසයක් ඇතුළත ශ්‍රේෂ්ඨාධිකරණයට යා හැකි යැයි ද කීය.