(කවිතා සුබසිංහ)

කඩවත පොලිස් ස්ථානයට අනුබද්ධ රාජකාරි කළ පොලිස් කොස්තාපල්වරයා ඝාතනය කිරීමේ සිද්ධිය සම්බන්ධයෙන් අධිකරණය වෙත ඉදිරිපත් කළ සැකකරුවන් පස් දෙනෙකු ලබන 03 වැනිදා දක්වා රිමාන්ඩ් ගත කිරීමට මහර වැඩ බලන මහේස්ත්‍රාත් රුසංකා සමරනායක මහත්මිය අද (23) වැනිදා නියම කළාය.

හපුආරච්චිලාගේ දොන් සසංක අකාශ් ලක්ෂාන් නොහොත් සුද්දා ,කරුණානායක පතිරණලාගේ කේෂාන් තාරක මධුවන්ත නොහොත් මංජු , හොදආරච්ච්පටබැදිගේ සදුන් ලක්ෂාන් , ජයසිංහ ආරච්චිගේ නිල්මිණි ප්‍රියදර්ශනී සහ ජයසිංහ මුදියංසේලාගේ සුදේශිකා සදනුවනි නැමැති සැකකරුවන් පිරිසක් මෙලෙස රිමාන්ඩ් ගත කරන ලෙස මහේස්ත්‍රාත්වරිය නියෝග කළාය.

සිද්ධිය සම්බන්ධයෙන්  සසංක අකාශ් ලක්ෂාන් නොහොත් සුද්දා නැමත්තා , කේෂාන් තාරක මධුවන්ත නොහොත් මංජු  හා සදුන් ලක්ෂාන් යන අය ඉකුත් 21 වැනි දා අත්අඩංගුවට ගෙන 22 වැනි දා අධිකරණය වෙත ඉදිරිපත් කිරීමේන් පසු  රැඳවුම් නියෝග මත රඳවා තබාගෙන ප්‍රශ්න කිරීමට නියෝග ලබා දී තිබූ  අතර පෑලියගොඩ කොට්ඨාස අපරාධ විමර්ශන ඒකකයේ නිලධාරීන් කණ්ඩායමක් ඉකුත් 22 වැනිදා  නිල්මිණි ප්‍රියදර්ශනී සහ සුදේශිකා සදනුවනි යන සැකකාරියන් දෙපල අත්අඩංගුවට ගැනීමෙන් පසුව රැඳවුම් නියෝග මත රඳවා තබාගෙන සිටි සැකකරුවන්  තිදෙනා සමඟ 23 වැනිදා මහර මහේස්ත්‍රාත් අධිකරණය වෙත ඉදිරිපත් කිරීමේන් අනතුරුව මෙලෙස රිමාන්ඩ් ගත කෙරිණි.

නිල්මිණි ප්‍රියදර්ශනී සැකකාරිය මරණයට පත් වුපොලිස් නිලධාරියා සමඟ හොටල් කාමරයේ සිටියදී දෙවන සැකකාරිය වන සුදේශිකා සදනුවනි යන අයට නිල්මිණි ප්‍රියදර්ශනීට අයත් ජංගම දුරකතනයෙන් සුදේශිකා සදනුවනි යන අයට ඇමතුමක් දී හෝටලයට කෑම රැගෙන එන ලෙස උපදෙස් දී තිබේ.

සුදේශිකා සදනුවනි යතුරුපැදියකින් කෑම රැගෙන පැමිණි විට නිල්මිණි ප්‍රියදර්ශනී කෑම ගැනීමට හෝටලය අසල ප්‍රධාන පාරට ඝාතනයට ලක් වූ පොලිස් කොස්තාපල්වරයා එවා ඇති අතර කෑම ලබා ගන්නවාත් සමඟම ත්‍රිවිල් රථයකින් පැමිණි පුද්ගලයින් හතරදෙනකු රාජපක්ෂ නිලධාරියාට පහර දී ත්‍රීරෝද රථයක දමාගෙන සඳනුවනි යන අයද පැමිණ යතුරුපැදියෙන් නිලධාරියාව පැහැරගෙන යන දෙසටම ගොස් තිබේ.

පැහැරගෙන යන අකාරය සීසීටීවි කැමරා දර්ශන වල සටහන් වී ඇති බවත් කිරිබත්ගොඩ පොලිසිය අධිකරණය වෙත වැඩිදුර වාර්තාවක් ඉදිරිපත් කරමින් සඳහන් කළේය.

කිරිබත්ගොඩ පොලිසිය මෘත දේහයේ පශ්චාත් මරණ පරීක්ෂණ කෙටි වෛද්‍ය වාර්තාවේ පිටපතක් ද අධිකරණය වෙත ඉදිරිපත් කළේය.

සිද්ධිය ට අදාල තවත් සැකකරුවන් සම්බන්ධයෙන් වැඩිදුර විමර්ශන සිදු කරමින් පවතින බවද කඩවත පොලිසිය අධිකරණයට දැනුම් දුන්නේය.