(මනෝප‍්‍රිය ගුණසේකර)
 
නීතීවිරෝධී ක‍්‍රියාකාරකම් වලින් උපයාගන්නා ලද රුපියල් කෝටි 55 ක මුදලක් සාපරාධි ලෙස සාවද්‍ය පරිහරණය කළ බවට හිටපු ජනාධිපති මහින්ද රාජපක්‍ෂ මහතාගේ කාර්ය මණ්ඩල ප‍්‍රධානියා ලෙස කටයුතු කළ ගාමිණි සෙනරත් මහතා ඇතුළු විත්තිකරුවන් තිදෙනාට එරෙහි මුදල් විශූද්ධිකරණ පනත යටතේ පවරා ඇති නඩුවේ විත්ති පාර්ශවය වෙනුවෙන් සාක්කිදීම සඳහා හිටපු භාණ්ඩාගාර ලේකම්වරයා, පොලිස්පතිවරයා ඇතුළු තිදෙනෙකුට ලබන 13 වැනිදා අධිකරණය හමුවේ පෙනී සිටින ලෙස විශේෂ ත‍්‍රිපුද්ගල මහාධිකරණය අද (6) නියම කළේය.

ගාමිණි සෙනරත් මහතා වෙනුවෙන් සාක්කිදීම සඳහා නම් කර ඇති හිටපු භාණ්ඩාගාර ලේකම් පී.බී. ජයසුන්දර මහතා, අනිවාර්ය නිවාඩු ගන්වා සිටින පොලිස්පති පුජිත් ජයසුන්දර මහතා සහ දුෂණ විරෝධී බළකායේ අධ්‍යක්ෂකවරයා ඇතුළු තිදෙනාට අධිකරණය හමුවේ පෙනී සිටින ලෙස නියම කරමින් සිතාසි නිකුත් කළ විශේෂ ත‍්‍රිපුද්ගල මහාධිකරණය එම සිතාසි ඔවුන්ට බාරදෙන ලෙස මුල්‍ය අපරාධ විමර්ශන කොට්ඨාසයට හා අධිකරණ පිස්කල්වරයාට නියම කළේය.

පැමිණිල්ලේ සාක්කි විභාගය අවසානයේ දී විත්තිකරුවන් වෙනුවෙන් සාක්කි ඉදිරිපත් කරන ලෙස කළ නියෝගයට අනුව මෙම නඩුව කැඳවනු ලැබු අවස්ථාවේදී ගාමිණි සෙනරත් මහතා වෙනුවෙන් සාක්කිදීම සඳහා සාක්කිකරුවන් ලෙස නම් කරමින් ජනාධිපති නීතීඥ අලි සබ්රි මහතා ඉදිරිපත් කළ සාක්කි ලැයිස්තුවේ සාක්කිකරුවන් ලෙස නම් කර සිටි අදාළ නිලධාරීන්ට එලෙස සිතාසි නිකුත් කළේය.

ත‍්‍රිපුද්ගල විශේෂ මහාධිකරණයේ ප‍්‍රථම විනිසුරු මඩුල්ල ලෙස පත් කරනු ලැබ සිටින කොළඹ මහාධිකරණයේ විනිසුරුවරුන් ලෙස කටයුතු කරන සම්පත් අබේකෝන් (සභාපති) සම්පත් විජේරත්න සහ චම්පා ජානකී රාජරත්න යන මහත්ම මහත්මීන්ගෙන් සැදුම්ලත් විනිසුරු මඩුල්ල හමුවේ මෙම නඩුව විභාග කරන ලදී.

2014 පෙබරවාරී මස පළමු වැනිදාත් 2015 ජනවාරි මස 20 වැනිදාත් අතර කාලය තුළ කොළඹදී පැමිණිල්ල නොදත් පිරිසක් සමඟ එක්ව කැන්විල් හෝල්ඩින්ස් පෞද්ගලික සමාගමේ කළමණාකාර අධ්‍යක්‍ෂ හා ප‍්‍රධාන විධායක නිලධාරී ලෙස කටයුතු කළ නඩුවේ දෙවැනි විත්තිකාර පියදාස කුඩාබාලගේ මහතා බාරයේ තිබු නීතීවිරෝධී ක‍්‍රියාකාරකම් වලින් උපලබ්ද වූ මුදල් සාපරාධී ලෙස සාවද්‍ය පරිහරණය කිරීම සඳහා කුමන්ත‍්‍රණය කළ බවට විත්තිකරුවන්ට එරෙහි නීතීපතිවරයා විසින් චෝදනා නඟා ඇත.