බිඟුන් මේනක ගමගේ 

 

ලංකා පාර්ලිමේන්තු ඉතිහාසයේ පළමු වතාවට මන්ත්‍රීවරුන් පස් දෙනෙකු සිය වත්කම් බැරකම් ප්‍රකාශ ජනගත කිරීමට අද (28) පියවර ගත්හ. 

ට්‍රාන්ස්පේරන්සි ඉන්ටනැෂනල් ශ්‍රී ලංකා ආයතනයේ මූලිකත්වයෙන් ක්‍රියාවට නැගුණු වත්කම් බැරකම් තොරතුරු ජනසතු කිරීමේ ව්‍යාපාරයේ පියවරක් හැටියට මෙම කටයුත්තට දායක වී ඇත්තේ එක්සත් ජනතා නිදහස් සන්ධානයේ වාසුදේව නානායක්කාර, විදුර වික්‍රමනායක, තාරක බාලසුරිය, දෙමළ ජාතික සන්ධානයේ එම්. ඒ. සුමන්තිරන් හා එක්සත් ජාතික පක්ෂය නියෝජනය කරන රාජ්‍ය ඇමැති එරාන් වික්‍රමරත්න යන මහත්වරුය. 

මෙම කටයුත්ත සම්බන්ධයෙන් අදහස් දැක් වූ ට්‍රාන්ස්පේරන්සි ඉන්ටනැෂනල් ශ්‍රී ලංකා ආයතනයේ විධායක අධ්‍යක්ෂ අසෝක ඔබේසේකර මහතා පැවැසුවේ මෙරට දේශපාලන සංස්කෘතියේ වෙනසක් වෙනුවෙන් තැබූ ඓතිහාසික පියවරක් බවට මෙම තොරතුරු හෙළිදරව්ව පත්වනු ඇති බවයි. 

මේ සම්බන්ධයෙන් අදහස් දක්වමින් ඔබේසේකර මහතා මෙසේ ද පැවැසීය.

“තම වත්කම් සහ බැරකම් ප්‍රකාශ ජනතාව අතට පත් කරන්නට මෙම පාර්ලිමේන්තු නියෝජිතයන් 06 දෙනා විසින් ගනු ලැබූ නිර්භීත පියවර අපගේ ප්‍රශංසාවට ලක්වෙනවා. මෙම අවස්ථාව,දේශපාලනඥයන්ගේ වත්කම් සහ බැරකම් ප්‍රකාශ ජනසතු කිරීමේ ව්‍යාපාරයේ සුවිශේෂී මං සළකුණක්. මෙම පියවර, පාර්ලිමේන්තුව මහජනතාව වෙත විවෘත කිරීමට, විනිවිදභාවය සහ වගවීමේ සංස්කෘතිය ප්‍රවර්ධනය කිරීමට මෙන්ම ජනතාව සහ ඔවුන්ගේ නියෝජිතයන් අතර පවත්නා දුරස්ථභාවය දුරලීමට ද හේතු වෙනවා. මෙය ආදර්ශයට ගනිමින් සෙසු සියලු ජනතා නියෝජිතයන් ද, තම වත්කම් සහ බැරකම් ප්‍රකාශ මහජනතාව අතට පත්කර නිසැක වශයෙන්ම තහවුරු කළ යුතු මහජන යහපත වෙනුවෙන් පෙනී සිටිනු ඇති බව අපගේ බලාපොරොත්තුවයි”. 

 

 

(එම ප්‍රකාශ නැරඹීමට පිවිසෙන්න - https://tisrilanka.us14.list-manage.com/track/click?u=57c6cb3a3800e1b647eef16aa&id=643118cb21&e=0198ab991a)