(බිමල් ශ්‍යාමන් ජයසිංහ සහ ශාන්ත ප්‍රදීප් කුමාර)

කොට්ටාව පොලිසියේ සුළු පැමිණිලි අංශයේ ස්ථානාධිපතිවරයාට අත්වාරුවකින් පහරදී පොලිසියේ දේපළ වලට අලාභ හානි කර පුද්ගලයන් තිදෙනකු අත්අඩංගුවට ගත් බව කොට්ටාව පොලිසිය කියයි.

පහරකෑමෙන් තුවාල ලද ස්ථානාධිපතිවරයා කළුබෝවිල ශික්ෂණ රෝහල වෙත ඇතුළත් කර ඇත

එම පහර දීමෙන් ස්ථානාධිපතිවරයාගේ දකුණු අතේ වැලමිටට තුවාල සිදුවී ඇති අතර චෝදනා ගාරයේ සවිකර තිබෙන මුහුණ බලන කණ්ණාඩියට ,මෙන්ම රජයෙන් නිකුත් කරන ලද පුටුවකට අලාභහානි සිදුවී ඇතැයි පොලිසිය කියයි

ඉඳුල් සහිත කැලිකසල අඩංගු බාල්දියක් බාර නොගත්තේ යැයි උරණ වී මහරගම නගර සභාවේ කැලිකසල ප්‍රවාහනය ලොරියක සේවකයකුට  පහර දී බාල්දියේ තිබූ ඉඳුල් සහිත අපද්‍රව්‍ය කසළ  තැන තැන විසි කිරීම සම්බන්ධව ලද පැමිණිල්ලක් විභාග කරමින් සිටියදී මෙම පහරදීම සිදුවී ඇති බව පොලිස් ආරංචි මාර්ග සඳහන් කරයි

පැමිණිල්ල සහ විත්ති පාර්ශවයේ පුද්ගලයන් සුළු පැමිණිලි අංශය වෙත කැඳවා පැමිණිල්ල විභාග කරමින් සිටියදී විත්ති පාර්ශවයේ පුද්ගලයකු ජංගම දුරකතනයකින් පැමිණිල්ල විභාග කරන අයුරු වීඩියෝ ගත කර තිබු බව පොලිස් ආරංචි මාර්ග සඳහන් කරයි

එය දුටු සුළු පැමිණිලි අංශයේ ස්ථානාධිපතිවරයා එලෙස නොකරන ලෙස අවවාද කිරීමත් සමග උරණ වූ අත්වාරුවෙන් සිටි පුද්ගලයා එකවරම ස්ථානාධිපතිවරයාගේ හිස ප්‍රදේශයට අත්වාරුවෙන් පහර දීමත් සමගම අත අල්ලා එය වැළැක්වූ අවස්ථාවේදී ස්ථානාධිපතිවරයා ගේ දකුණු අතේ වැලමිට ප්‍රදේශයට එම පහර වැදී තුවාල සිදුවී තිබූ බව පොලිස් නිලධාරියකු පැවැසීය

ඒ සමගම අනෙක් සැකකරුවන් දෙදෙනා ද එම ස්ථානයේ කලබලකාරී ලෙස හැසිරීම නිසා පොලිසියේ තිබූ දේපළවලට අලාභ හානි සිදුවී තිබූ බවත් සෙසු නිලධාරීන් අවම බලය පාවිච්චි කර සැකකරුවන් අත්අඩංගුවට ගත් බවත් පොලිසිය කියයි