(සුජිත් හේවාජුලිගේ සහ අංජුල මහික වීරරත්න )

සමාජ සේවා වැනි පොදු විෂයන් එක් අමාත්‍යාංශයක් යටතේ පැවතීම වැදගත්බව රජයේ ගිණුම් පිළිබඳ පාර්ලිමේන්තු කාරක සභාව(කෝපා )පවසයි.

සමාජ සේවා දෙපාර්තමේන්තුවේ වර්තමාන කාර්ය සාධනය පරීක්ෂා කිරීම සඳහා මෙම කාරක සභාව එහි සභාපති, පාර්ලිමේන්තු මන්ත්‍රී මහාචාර්ය තිස්ස විතාරණ මහතාගේ ප්‍රධානත්වයෙන්  රැස්විය.

එහිදී අදහස් දැක් වූ රාජ්‍ය ඇමතිනී විශේෂඥ වෛද්‍ය සුදර්ශනි පුනාන්දුපුල්ලේ මහත්මිය සඳහන් කළේ අමාත්‍යාංශවල විෂය පථය සැකසීමේදී ප්‍රමිතිකරණයක් පැවතීම අත්‍යාවශ්‍ය බවයි.

ආබාධිත දරුවන් වෙනුවෙන් සේවය කිරීමට දිස්ත්‍රීක් මට්ටමින් ආයතන පිහිටුවීමේ අවශ්‍යතාවද ඇය පෙන්වා දුන්නාය.

මතට ඇබ්බැහිවූවන් පුනරුත්ථාපනය කිරීම,ඔවුන්ට පුහුණුව ලබාදීම හා සමාජගත කිරීමේ ක්‍රියාවලිය එක් ආයතනයකින් නියාමනය කිරීමේ අවශ්‍යතාව කාරක සභාව පෙන්වා දුන්නේය.

දීර්ඝ කාලයක සිට සමාජ සේවා දෙපාර්තමේන්තුවේ පවතින පුරප්පාඩු කඩිනමින් සම්පූර්ණ කළ යුතු බවද කාරක සභාවේ සභාපතිවරයා අවධාරණය කළේය.