(නිමල කොඩිතුවක්කු)

කොවිඩ් - 19 වසංගතය හමුවේ අභියෝගයට මුහුණ දුන් පොදු ප්‍රවාහන සේවාව නැවත නංවාලීම සඳහා පෞද්ගලික බස්රථ හිමියන් වෙනුවෙන් නව ණය යෝජනා ක්‍රමයක් හදුන්වා දීමට ප්‍රවාහන අමාත්‍යාංශය පියවර ගෙන තිබේ.

ඒ අනුව දුෂ්කරතාවයට පත්ව සිටින පෞද්ගලික බස්රථ හිමියන් සඳහා රුපියල් ලක්ෂ 3ක ණය මුදලක් හා ටිකට්පත් යන්ත්‍ර මිලදී ගැනීම සඳහා තවත් රු. 50,000 ක ණයක් ලබාදීම මේ යටතේ සිදුකරන බව ප්‍රවාහන අමාත්‍ය ගාමිණී ලොකුගේ මහතා පැවසීය.

පෞද්ගලික බස්රථ හිමියන් රජයෙන් කරන ලද ඉල්ලීමකට අනුව ප්‍රවාහන අමාත්‍යාංශය, ජාතික ගමනාගමන කොමිෂන් සභාව හා පළාත්බද මාර්ගස්ථ මගී ප්‍රවාහන අධිකාරිය සමඟ එක්ව රාජ්‍ය බැංකු හරහා මෙම ණය මුදල ප්‍රදානය කරන බවත් අමාත්‍යවරයා සඳහන් කළේය.

පෞද්ගලික බස්රථ හිමියන් 27 දෙනෙකුට සංකේතාත්මකව එම ණය මුදල ලබා ගැනීමට අවශ්‍ය ණය ප්‍රදාන ලිපි ලබාදීම ප්‍රවාහන අමාත්‍ය ගාමිණි ලොකුගේ මහතාගේ ප්‍රධානත්වයෙන් ජාතික ගමනාගමන කොමිෂන් සභා ශ්‍රවණාගාරයේ දී අද (15) දින සිදුකෙරිණ.

පෞද්ගලික බස් කර්මාන්තය කඩා නොවැටී පවත්වාගෙන යාම සඳහා ගත හැකි සෑම පියවරක්ම ගැනීමටත්, මගී ජනතාවට අපහසුවෙන් තොරව සුව පහසු ප්‍රවාහන සේවාවක් ලබා දීමත් රජයේ මූලික අරමුණ බව මෙහිදී අදහස් දැක්වු ප්‍රවාහන අමාත්‍ය ගාමිණි ලොකුගේ මහතා පැවසීය.

මෙම අවස්ථාවට ප්‍රවාහන අමාත්‍යාංශ ලේකම් මොන්ටි රණතුංග, ප්‍රවාහන රාජ්‍ය අමාත්‍යාංශ ලේකම් එස්.එම්.ඩී.එල්.කේ. ද අල්විස්, ජාතික ගමනාගමන කොමිෂන් සභාවේ සභාපති ශෂි වෙල්ගම යන මහත්වරුන්  ඇතුළු පිරිසක් එක්ව සිටියහ.