(තිළිණි ද සිල්වා සහ රංජන් කටුගම්පොළ)
 
අධිකරණයට  අපහාස කර ඇතැයි කියමින්  හිටපු අගවිනිසුරු සරත් එන් සිල්වා මහතාට එරෙහිව ගොනුකර ඇති මුලික අයිතිවාසිකම් පෙත්සම් විභාගයෙන්  ශ්‍රේෂ්ඨාධිකරණය විනිසුරු ප්‍රසන්න ජයවර්ධන මහතා  අද (08) ඉවත්විණි.

මේ හේතුවෙන් එම පෙත්සම සලකා  බැලීම ජුනි මස 28 වන දක්වා කල්තැබීමට ශ්‍රේෂ්ඨාධිකරණය තීන්දු කරන ලදී.

එම පෙත්සම අද (07) ප්‍රසන්න ජයවර්ධන, මුර්දු ප්‍රනාන්දු සහ ගාමිණි අමරසේකර යන ත්‍රිපුද්ගල විනිසුරු මඩුල්ල හමුවේ කැඳවිණි.

මෙහිදී විනිසුරු ප්‍රසන්න ජයවර්ධන මහතා විවෘත අධිකරණය හමුවේ ප්‍රකාශ කළේ පෙත්සමේ සඳහන් වන ආකාරයට වගඋත්තරකරුගේ ප්‍රකාශයට පාදක වූ බව කියන තහනම් නියෝගය නිකුත් කළ විනිසුරු මඩුල්ලේ තමා ද සාමාජිකයෙකු වශයෙන් කටයුතු කළ හෙයින් තමන් මෙම නඩු විභාගයට සහභාගි වීමට අකැමැත්ත පළ කරන බවය.

ඒ අනුව මෙම පැමිණිල්ල වෙනත් විනිසුරු මඩුල්ලක් හමුවේ ජුලි මස 28 වන දා සලකා බලන බව ශ්‍රේෂ්ඨාධිකරණය නියම කළේය.

ජ්‍යෙෂ්ඨ මහාචාර්යවරුන් වන චන්ද්‍රගුප්ත තේනුවර,  ප්‍රශාන්ත ගුණවර්ධන සහ මහාචාර්ය හේවා වඩුගේ  සිරිල් යන මහත්වරු විසින් මෙම පැමිණිල්ල ඉදිරිපත් කර තිබුණි.

පෙත්සම්කරුවන් කියා සිටියේ ඉකුත් දෙසැම්බර් මස තුන්වනදා මරදාන ප්‍රදේශයේ පැවති මහජන රැළියකදී කරුණු දැක්වූ හිටපු අගවිනිසුරු සරත්. එන්. සිල්වා මහතා පසුගියදා පාර්ලිමේන්තුව විසුරුවා හරිමින් ජනාධිපතිවරයා විසින් නිකුත් කළ ගැසට් නිවේදනය ක්‍රියාත්මක කිරීම අත්හිටුවමින් ශ්‍රේෂ්ඨාධිකරණය විසින් නිකුත් කළ තහනම් නියෝගය පිළිබඳව දැක්වූ අදහස් තුළින් ඔහු අධිකරණයට අපහාස කර ඇති බවයි.

ඔහු අධිකරණයට අපහාසයක් සිදු කර ඇති බවට තීන්දු කර සුදුසු දඬුවම් පමුණුවන ලෙස ද පෙත්සම්කරුවන් ශ්‍රේෂ්ඨාධිකරණයෙන් ඉල්ලා තිබේ.