බිඟුන් මේනක ගමගේ 
 
 
රටට අවශ්‍ය නව ආණ්ඩුක්‍රම ව්‍යවස්ථාවක් නිර්මාණය කරගැනීමට විපක්ෂ නායක මහින්ද රාජපක්ෂ මහතා ද කැපවිය යුතු යැයි ද පන්සල් ගානේ ගොස් කරන වොයිස් කට් දේශපාලනයෙන් කිසිදු සෙතක් නැතැයි ද අධිකරණ හා බන්ධනාගාර ප්‍රතිසංස්කරණ ඇමැතිනි තලතා අතුකෝරාල මහත්මිය ‘ලංකාදීප’ යට පැවසීය.
 
වගකිව යුතු දේශපාලන පක්ෂ සියල්ලම නව ආණ්ඩුක්‍රම ව්‍යවස්ථාව වෙනුවෙන් කැපවිය යුතු යැයි ද අපි ඕකට නැතැයි කියා බොරු බිල්ලන් මවා ජන සමාජය භීතියට පත්කිරීම පහත් දේශපාලනයක් යැයි ද ලංකාදීප 'සඳුදා හමුව' දේශපාලන සාකච්ඡාවට එක්වෙමින්  ඇමැතිවරිය චෝදනා කළාය.
 
බලය තිබියදී මෙන්ම අහිමිව තිබියදී ද එය ඉවසා කටයුතු කිරීමට එක්සත් ජාතික පක්ෂයට ජීවන විලාසයක් ඇතත් විපක්ෂයේ ඇතැමුන්ට එවැනි සංයමයක් නැතැයි ද අතුකෝරාල මහත්මිය කීවාය.
 
දැනට කිසිදු ආණ්ඩුක්‍රම ව්‍යවස්ථා කෙටුම්පතක් සකස් කර නැතැයි ද සකස් කර ඇති වාර්තාව ද ආණ්ඩුක්‍රම ව්‍යවස්ථා මණ්ඩලයේ කමිටු පහත් සාමාන්‍ය පුරවැසියනුත් ඇතුළු සියලු පාර්ශ්වයකින්ම ඉදිරිපත් කළ අදහස් මත පදනම්ව සැකසූවක් යැයි ද ඇමැතිනි අතුකෝරාල මහත්මිය වැඩිදුරටත් සඳහන් කළාය.