2023 මාර්තු මස 25 වන සෙනසුරාදා
(තිලකරත්න දිසානායක)
ගම්පහ ඇතුළු අවට ප්‍රදේශවල නිවෙස්වලට ඇතුළු වී දිවා සහ රාත්‍රී කාලයේදී භාණ්ඩ සොරකම් කළ බව කියන මත්කුඩු ජාවාරම්කාරයෙකු, ගම්පහ පොලිස් අපරාධ විමර්ශන අංශය මගින් අද (21) අත්අඩංගුවට ගෙන ඇත.
සැකකරු නිවන්දම ප්‍රදේශයේ පදිංචි 27 හැවිරිදි බණ්ඩි හුංගා හෙවත් පෙත්තා නැමැති අන්වර්ථ නාමයෙන් හැඳින්වෙන අයෙකු බව පොලිසිය කියයි.
අපරාධ විමර්ශන අංශයේ නිලධාරියෙකුට ලැබුණු තොරතුරක් මත මාකේවිට, වැලිකඩ ප්‍රදේශයේදී අංක තහඩු නොමැති යතුරුපැදියකින් යමින් සිටියදී මෙලෙස අත්අඩංගුවට ගෙන ඇති අතර එම අවස්ථාවේ සැකකරු ළඟ තිබී හෙරොයින් මිලිග්‍රෑම් 710ක ප්‍රමාණයක්ද තිබූ බව පොලිසිය පවසයි.
කලක පටන් නිවෙස්වලින් මෙලෙස භාණ්ඩ සොරකම් කෙරෙන බවට ලැබී ඇති පැමිණිලි කිහිපයක් මත මෙම සැකකරු අත්අඩංගුවට ගෙන ඇති අතර ඔහුගෙන් ප්‍රශ්න කිරීමේදී අනාවරණය වී ඇත්තේ තවත් සඟයන් දෙදෙනෙකු ද හවුල් කර ගනිමින් කිසිවෙකු නොමැති නිවෙස් බලා සොරාගත හැකි භාණ්ඩ රැගෙන ගොස් විවිධ ස්ථානවලට අලෙවි කළ බවයි.
මෙලෙස අලෙවි කරන ලද වතුර මෝටරයක්, ගෑස් ලිප් දෙදක් ඇතුළු භාණ්ඩ කිහිපයක් ස්ථාන කිහිපයකට අලෙවි කොට තිබී සොයා ගෙන ඇති අතර මොවුන් විසින් සොයා ගත් තවත් භාණ්ඩ කිහිපයක් සොයා ගැනීමට ඇති බව ද පොලිසිය කියයි.
සැකකරු අත්අඩංගුවට ගන්නා ලද අවස්ථාවේ පැමිණි යතුරුපැදියෙහි ලියකියවිලි කිසිවක් නොමැතිවී ඇති අතර එහි අංක තහඩු යතුරුපැදියෙහි සඟවා තිබී සොයා ගෙන ඇත.
ගම්පහ මූලස්ථාන ප්‍රධාන පොලිස් පරීක්ෂක ලක්ෂ්මන් බණ්ඩාර මහතාගේ උපදෙස් මත අපරාධ විමර්ශන අංශාධිපති ප්‍රධාන පොලිස් පරීක්ෂක ධර්මසූරිය මහතාගේ අධීක්ෂණය යටතේ පොලිස් පරීක්ෂක කේ.එච්.කේ. සංගීත් මහතාගේ මෙහෙයවීමෙන් මේ සැකකරු අත්අඩංගුවට ගෙන ඇති අතර ගම්පහ මහේස්ත්‍රාත් අධිකරණය වෙත ඉදිරිපත් කිරීමට නියමිතව තිබිණි.
